2025 йил I ярмида Lex.uz қонунчилик базасида энг кўп ўқилган ҳужжат Ўзбекистон Конституцияси бўлди. Бу ҳақда Адлия вазирлиги эълон қилган ҳисоботда маълум қилинди.
Lex.uz платформасида жами 14 минг 544 та амалдаги норматив-ҳуқуқий ҳужжатлар мавжуд. Шундан 541 таси жорий йил январь июнь ойларида қабул қилинган. Базадан кунлик фойдаланувчилар сони 37–39 мингта атрофида.
Платформада олти ой давомида 10 та ҳужжат энг кўп кўрилган. Улар умумий ҳисобда 516,6 минг марта ўқилган.
Энг кўп ўқилган ҳужжатлар рўйхатидан биринчи ўринни Конституция эгаллаган. Шу билан бирга, Жиноят, Маъмурий жавобгарлик ва Меҳнат кодекслари нисбатан кўпроқ ўқилган.
“Шахсга доир маълумотлар тўғрисида”ги қонун бешинчи ўринда қайд этилган. Олтинчи ўрин “2022-2026 йилларга мўлжалланган Янги Ўзбекистон тараққиёт стратегияси тўғрисида”ги президент фармонига берилган.
Ўз навбатида еттиликка “Таълим тўғрисида” қонун кирган. “Йўл ҳаракат қоидаларини тасдиқлаш тўғрисида”ги ҳукумат қарори саккизинчи ўриндан жой олган.
Якуний икки ўринни маҳаллаларда хавфсизликни таъминлашга оид президент қарори ва Халқ таълими вазирлигининг хорижий тиллар сертификатини тасдиқлаш бўйича қарори эгаллаган.
Аввалроқ Адлия вазирлиги 2025 йил I ярмида 316 та қонунчилик ҳужжатлари жамоатчилик муҳокамасига қўйилганини маълум қилганди.
Изоҳ (0)