Toshkent viloyatida yangi xalqaro aeroport qurilishi rejalashtirilgan. Bu haqda 1-avgust kuni Prezident matbuot xizmati xabar berdi.

Prezident Shavkat Mirziyoyevga transport sohasidagi yirik loyihalar bo‘yicha axborot berildi.
Maʼlum qilinishicha, Toshkent shahriga aviayo‘lovchilar oqimi 2030-yilda 15 millionga yetishi kutilmoqda. Lekin bunga hozirgi aeroportning quvvati yetmaydi. Shahar ichida joylashgani sababli uni kengaytirish imkoni ham yo‘q.
“Shu bois Toshkent viloyatida yangi xalqaro aeroport qurish rejalashtirilgan. Bugungi kunda xususiy sheriklik bo‘yicha xorijiy kompaniyalar takliflari ko‘rib chiqilmoqda”, deyiladi manbada.

Taqdimotda mutasaddilar yangi aeroport qurish loyihasining barcha jihatlari bo‘yicha axborot bergan.
Qayd etilishicha, so‘nggi yillarda yo‘l xo‘jaligiga ham katta mablag‘ ajratilib, yangi inshootlar barpo etilmoqda. Avtotransportlar harakatiga qulaylik yaratish maqsadida muqobil yo‘llar qurilishi ham loyihalashtirilyapti. Bu borada investorlarga jozibador muhit yaratish uchun “Avtomobil yo‘llari to‘g‘risida”gi qonun yangi tahrirda ishlab chiqilgan.

“Shularga asoslanib, Toshkent bilan Samarqand o‘rtasida muqobil tezyurar yo‘l qurish loyihasiga bir necha hamkor davlatlar kompaniyalari qiziqish bildirgan. Mutasaddilar ular bilan o‘tkazilgan muzokaralar natijalari va takliflari haqida hisobot berdi”, deb yozgan manba.

Davlat rahbari ushbu strategik infratuzilmalarni puxta o‘ylab loyihalashtirish va tezroq amaliy bosqichga o‘tish zarurligini taʼkidlagan.
Ma’lumot uchun, o‘tgan yili may oyida Buxoroda xalqaro aeroport qurilishiga start berilgandi.
Izoh (0)