Energetika vaziri Jo‘rabek Mirzamahmudov iqtisodchi, bloger Otabek Bakirov ustidan prokuratura va IIVga shikoyat arizasi kiritdi. Bu haqda Otabek Bakirov Telegram-kanalida maʼlum qildi.
Shikoyat Bakirovning 2023-yil 5-iyun kuni Sag‘bon podstansiyasi bilan bog‘liq muammo haqida yozgan posti bilan bog‘liq.
Bildirilishicha, post mundarijasida haqorat va obro‘sizlantirish holatlari mavjud va bu bo‘yicha Otabek Bakirovga nisbatan tegishli tartibda chora ko‘rilishi lozim.
Vazir Mirzamahmudov organlarga shikoyat arizasini 2024-yil 10-oktyabr kuni taqdim etgan.
Qiziq tarafi, qachondir haykal qo‘yiladigan Sag‘bon podstansiyasi bilan bog‘liq surunkali muammo yoritilgan post 2023-yil 5-iyunda yoki 1 yil-u 7 oy avval yozilgan. Mirzamahmudov organlarga shikoyat arizasini 2024-yil 10-oktyabrda, yaʼni bir yil-u 4 oy o‘tib taqdim etmoqda.
Undanam qizig‘i, vazir Mirzamahmudov arizasini “Lolazor” mehmoni bo‘lgach, 6 kun o‘tib qoldirgan.
Yana bir qiziq fakt, adashmasam, “Lolazor”ning birinchi sonidan keyin energetiklarning taklifi bilan (vazir keladi deyishgandi) tinimsiz taʼmirlanayotgan Sag‘bon podstansiyasiga ham borgandik va kichik reportaj ham uyushtirgandik.
Nima bo‘lgandayam, o‘shandan keyin bizning Toshkent tumani Sag‘bondan uzilgan va elektr energiyasini boshqa, tumanimizdagi podstansiyalardan olmoqdamiz, deya qo‘shimcha qilgan Otabek Bakirov.
Iqtisodchiga ko‘ra, “shikoyat arizasi fuqaro Mirzamahmudov tarafidan emas, vazir Mirzamahmudov tomonidan kiritilgan”.
Ariza hozirda poytaxt IIB Kiberxavfsizlik bo‘linmasi tomonidan o‘rganilmoqda.
Izoh (0)