Toshkentda dunyoning turli mamlakatlaridan kelgan o‘zbekistonliklar ishtirokida xalqaro forum o‘tkazildi

Toshkentda 26-sentyabr kuni dunyoning turli mamlakatlaridan kelgan o‘zbekistonliklar, ishbilarmon doiralar vakillari, diplomatlar va turli soha mutaxassislari ishtirokida “O‘zbekistonlik.Toshkent” IV xalqaro forumi bo‘lib o‘tdi.

“O‘zbekistonlik” forumlarining maqsadi — butun dunyo bo‘ylab yoyilgan o‘zbekistonliklar o‘rtasida global netvorkingni yo‘lga qo‘yish va O‘zbekistonni intellektual, iste’dodli va mehnatkash insonlar mamlakati sifatida tarannum etish. Uzbekistan’s club ijodiy jamoasi tomonidan tashkil etiladigan xalqaro “O‘zbekistonlik” forumlari avvalroq Berlin (Germaniya), Parij (Fransiya) va London (Angliya) shaharlarida muvaffaqiyat bilan bo‘lib o‘tgan edi. 

Tadbirning eng muhim voqealaridan biri — ilk bor taqdim etilgan “Oltin Chinor” milliy mukofoti bo‘ldi. Bu mukofot ijtimoiy mas’uliyat sohasidagi yetakchi kompaniyalarni rag‘batlantirish maqsadida ta’sis etilgan bo‘lib, unga eng ilg‘or ijtimoiy loyihalarni amalga oshirgan korxonalar loyiq ko‘rildi. “Oltin Chinor—2024” mukofoti Agrobank, TBC Bank, Korzinka.uz, SQB, Kapitalbank, Uzum va Payme ekotizimlariga topshirildi.

Forumga tashrif buyurganlar Uzbekistan’s club nomli jurnalning ikkinchi soni bilan ham tanishish imkoniyatiga ega bo‘ldi. Zamonaviy va o‘ziga xos uslubga ega ushbu jurnal trendlarni boshlab berish uchun yaratilgan. Uning vazifasi — zamonaviy o‘zbekistonlikning yangi qiyofasiga namuna bo‘layotgan shaxslar va ularning obrazlarini targ‘ib qilish. 

Jurnal sahifalaridan Qahramon Quronboyev, bolalar ombudsmani Surayyo Rahmonova, elchilar Furqat Siddiqov va Jonatan Henik, sportchilardan Oksana Chusovitina va Timur Kapadze, taniqli iqtisodchi Otabek Bakirov va boshqa nomdor o‘zbekistonliklar bilan intervyular o‘rin olgan.

Uzbekistan’s club jurnali va Progressiv islohotlar markazi tashabbusi bilan O‘zbekiston tarixida ilk marta o‘zbek olimlarining top-10 taligi e’lon qilindi. Ro‘yxat xalqaro reytinglar, ommaviy axborot vositalaridagi chiqishlar va boshqa ko‘rsatkichlar asosida tuzilgan.