Toshkent shahar hokimligi poytaxt ko‘chalarida pulli to‘xtash joylarini boshqarish huquqi uchun auksion o‘tkazishi haqida xabar berilgan edi. Auksion yakuniga ko‘ra, 120 milliard so‘m taklif bilan Balcomuz MCHJ qo‘shma korxonasi g‘olib bo‘ldi.
Boshlang‘ich narx 57 milliard so‘mni tashkil etgandi. Auksion poytaxtda jami 86 ta pulli parkovka uchastkasini ijaraga berish bo‘yicha o‘tkazildi.
Iqtisodchi Otabek Bakirov Toshkentdagi 50 dan ortiq eng gavjum va likvidli ko‘chalar bitta lotda savdoga chiqarilishini tanqid qilgandi. “Agarda auksion poytaxt ma’muriyati istagandek o‘tsa, shaharda yagona parkovka qiroli paydo bo‘ladi. G‘olibi oldindan yopiq kabinetlarda kelishilmagan bo‘lmasa, bu jarayonni auksion deyishga til bormaydi” degan edi iqtisodchi.
“Raqobat qo‘mitasi va Antikorrupsiya agentligi poytaxtda parkovka monopoliyasini yaratishi mumkin bo‘lgan, belgilariga ko‘ra auksion deb atash qiyin bo‘lgan auksionni to‘xtatmagan. Balki harakat qilishgandir, bilmadim”, deb yozdi Otabek Bakirov auksion yakunlari e’lon qilingach.
Iqtisodchi auksionning zaxira g‘olibi nomi ko‘rsatilmaganiga e’tibor qaratdi (g‘olib shartlarni bajara olmasa, g‘oliblik keyingi eng ko‘p narx taklif etgan talabgorga o‘tadi).
“G‘olibga ko‘p savollar yo‘q, savollar hammasi raqobatli bo‘lmagan auksion tashkilotchilariga. Bu yakka lotni o‘nlab lotlarga ajratish va talabgorlar ko‘paytirish hisobiga, huquqlarni 120 milliard so‘m emas, balki 500 milliard so‘mga sotish mumkin bo‘lardi. Bozorda o‘zaro raqobatlashuvchi bir necha kompaniyalar shakllanardi, davlat yutardi, iste’molchi yutardi. Hozir yutgan bo‘lsa, kabinetda o‘tirgan chinovnik yoki qanaqadir yutdi, xolos. Qolgan hamma yutqizdi”, deydi u.
Otabek Bakirov buni Toshkent uchun, O‘zbekiston uchun navbatdagi mag‘lubiyat deb atadi. “Bundan ham battar bo‘lamiz bu ketishda”, deb ta’kidladi u.
G‘olib kompaniya haqida
Balcomuz MCHJning 60 foiz ulushi Balcom Co.Ltd (Yaponiya) kompaniyasiga, 20 foizi Nuriddinov Avazbek Shokirjon o‘g‘liga, 10 foizi Akramov Bobur Axatovichga hamda qolgani (10 foiz) Hoshimov Anvar Olim o‘g‘liga tegishli. Kompaniya saytida aytilishicha, ular restoran (Flamingo), IT, qurilish, konsalting va ko‘ngilochar xizmatlar (Central Park) bozorida faoliyat yuritadi.
Toshkentda pulli to‘xtash joylari
Toshkentda avtomobillar uchun yo‘l bo‘ylarida pulli to‘xtash joylari tashkil etilishi haqida 2021-yilda ma’lum bo‘lgandi. O‘shanda “Toshkent shahar transporti va yo‘l-transport infratuzilmasini 2025-yilgacha rivojlantirish konsepsiyasini tasdiqlash to‘g‘risida”gi Vazirlar Mahkamasi qarori loyihasida poytaxtdagi tirbandliklarni, markaziy ko‘chalarda transport oqimini kamaytirish, avtomobillarning yo‘l bo‘yida betartib to‘xtashini tartibga solish maqsadida yagona avtomobil yo‘l bo‘yi pulli to‘xtash joylari tizimini tashkil etish zarurligi aytilgandi.
Dastlab 10 ta markaziy ko‘chada pulli avtomobil to‘xtash joylari tarmog‘i paydo bo‘lishi e’lon qilindi.
Prezidentning 2022-yil 2-fevraldagi qaroriga muvofiq, 2022-yilda 10 ta markaziy ko‘chalarda, ya’ni Glinka, Bratislava, Mirobod, Avliyo ota, Taras Shevchenko, Said Baraka, Moshtabib, Fidokor, Sodiq Azimov va Yakub Kolas ko‘chalarida davlat-xususiy sheriklik asosida avtomobillarning avtomatlashtirilgan yo‘l bo‘yi pulli to‘xtash joylarini tashkil etish belgilandi.
2024-yil 16-oktyabr kuni Shavkat Umurzoqov Toshkent shahrida transport vositalarining pulli to‘xtab turish faoliyatini yanada takomillashtirish chora-tadbirlari to‘g‘risidagi qarorni imzoladi. Hujjatda pulli to‘xtab turish joylaridan foydalanganlik uchun to‘lovlar miqdori ham tasdiqlandi. Parking hududlari 5 ta tarif zonasiga bo‘linadi.
Bir soatlik to‘xtab turish narxlari:
- 1-tarif zonasida 12 ming so‘m;
- 2-tarif zonasida 10 ming so‘m;
- 3-zonada 8 ming so‘m;
- 4-zonada 6 ming so‘m;
- 5-tarif zonasida 5 ming so‘mni tashkil qiladi.
Parking transport vositalarini saqlash uchun mo‘ljallanmagan. U yerda uchinchi shaxslar tomonidan transport vositalarining olib qochilishi va shikastlanishi xavfi avtomobillar egalari zimmasida qoladi.
2024-yil 19-yanvarda “Yo‘l harakati to‘g‘risida”gi qonun prezident tomonidan imzolangandi. Qonunda pulli to‘xtab turish joylarining egalari ushbu joylardan foydalanganlik uchun to‘lov miqdorini Qoraqalpog‘iston Vazirlar Kengashi, viloyatlar va Toshkent shahar hokimliklari tomonidan Iqtisodiyot va moliya vazirligi bilan kelishilgan holda belgilanadigan cheklangan miqdorlardan yuqori bo‘lmagan tariflar bo‘yicha mustaqil ravishda belgilashi qayd etilgan.
Izoh (0)