O‘zbekiston oltin-valyuta zaxiralari 1-noyabr holatiga ko‘ra 43,14 milliard dollarni tashkil etdi. Bu haqda Markaziy bank ma’lumotlarida keltirilgan.
Oktyabr oyida mamlakat zaxiralari 2 milliard dollarga yoki qariyb 5 foizga oshdi va rekord darajaga yetdi. Zaxiralar ketma-ket to‘rt oydan beri o‘smoqda.
Zaxiralardagi oltin hajmi sentyabrdagi darajada qoldi — 12 million troya unsiyasi (367 tonna). Oltin zaxiralari qiymati 1,44 milliard dollarga oshib, 33,36 milliard dollarga yetgan.
Markaziy bankning xorijiy hisobvaraqlaridagi naqd valyuta hajmi 445,5 million dollarga oshib, 9,11 milliard dollarga yetdi. Shundan 414,4 million dollari boshqa Markaziy banklar va Xalqaro valyuta jamg‘armalari, qolgan 8,67 milliard dollari esa boshqa xorijiy moliya institutlarida saqlanadi.
“Oltin narxining pasayishiga ta’sir ko‘rsatuvchi omillar jamlanib borayotgani hisobga olinsa, 1-noyabr holatiga zaxiralar qoldig‘i yaqin istiqbol uchun tarixiy maksimum bo‘lib qolishi mumkin”, deb yozmoqda iqtisodchi Otabek Bakirov.
Izoh (0)