“Bavariya” klubi tomonidan tashkil etilgan yoshlar futbol lagerida afg‘onistonlik murabbiy vafot etdi. Bu haqda Germaniyaning Sächsische Zeitung nashri xabar berdi.
Ushbu lagerda 5 kun davomida 119 nafar bola “Bavariya” va mahalliy klublar murabbiylari ishtirokida mashg‘ulot olib borayotgan edi. Ammo 2-iyul, chorshanba kuni mashg‘ulotlar vaqtida bir murabbiy maydon chetida hushidan ketib qulagan. Shoshilinch yordam xizmatlari darhol hodisa joyiga yetib kelgan bo‘lsa-da, murabbiy kasalxonaga olib ketilganidan so‘ng vafot etgan.
Marhumning avvalgi ishlagan klubi — Avstriyaning “Hartberg” jamoasi uni quyidagicha yodga oldi:
Uning xushmuomalaligi, samimiyligi va professionalligi futbolchilar, ota-onalar, hamkasblar va klub rahbariyati orasida juda hurmatli shaxsga aylantirgan edi. Kutilmagan voqea barchamizni chuqur qayg‘uga soldi.
“Bavariya” klubi vafot etgan murabbiyning oilasi bilan aloqada bo‘lib, dafn marosimida gulchambar qo‘yishni rejalashtirgan. Shuningdek, oilaga moddiy va ma’naviy yordam ko‘rsatishlarini bildirgan.
Mazkur fojiadan so‘ng bolalar, ota-onalar va lager murabbiylariga ruhiy yordam ko‘rsatish uchun maxsus psixologik guruh jalb etildi. Lager esa muddatidan avval bekor qilindi.
Izoh (0)