Xitoydagi vaziyat
Xitoy Sog‘liqni saqlash milliy komissiyasining ma’lumotlariga ko‘ra, Xitoyda so‘nggi bir sutka ichida 42 ta o‘lim holati qayd etilgan bo‘lib, yana 202 kishida koronavirus aniqlangan. Mamlakatda umumiy hisobda kasallanganlar soni 80 026 kishiga yetdi.
Butun dunyo bo‘ylab yangi turdagi COVID-19 koronavirusi bilan kasallanganlar soni 88 232 kishiga yetdi, deya xabar berdi South China Morning Post. Virus oqibatida vafot etganlar soni 3041 kishiga yetgan, 42 mingdan ortiq bemor davolanishga muvaffaq bo‘lgan.
O‘zbekistondagi vaziyat
Sog‘liqni saqlash vazirligi koronavirus infeksiyasi kirib kelishining oldini olish maqsadida vazirlik, qo‘mita va agentliklar bilan hamkorlikda idora xodimlarini dunyodagi bugungi qaltis epidemik vaziyatdan ogoh etib, profilaktik tadbirlarni kuchaytirish, shaxsiy gigiyenaga qat’iy rioya qilishga chaqirmoqda.O‘zbekistondagi barcha maktablarda koronavirusga qarshi choralar kuchaytiriladi. Sog‘liqni saqlash vazirligi mavjud 9950 ga yaqin umumta’lim muassasalarida tegishli sanitariya choralarini amalga oshirish orqali xodimlar va o‘quvchilarning salomatligini muhofaza qilish maqsadida Xalq ta’limi vazirligi bilan qo‘shma qaror qabul qilgan.
O‘zbekiston koronavirus sabab Seul, Tokio, Rim, Afg‘oniston va Eron bilan aviaqatnovlarni vaqtinchalik to‘xtatdi. Toshkentga Janubiy Koreyadagi bir guruh o‘zbekistonlik evakuatsiya qilingani xabar berilgandi.
Oliy Majlis Senatiga tashrif buyuruvchilarning isitmasi bor-yo‘qligi (tana haroratining yuqoriligi COVID-19 koronavirusi infeksiyasining belgilaridan biri hisoblanadi) teplovizorlar yordamida tekshirilmoqda.
Bundan tashqari, Davlat xavfsizlik xizmati xodimlari yuzlariga niqob taqqan holda xizmat olib borgan. “Gazeta.uz” muxbiri kirish joyida qo‘riqchilardan biri binoni isiriq bilan tutatayotganiga guvoh bo‘lgan. Bino liftlariga nafas olish yo‘llari yuqumli kasalliklar profilaktikasi haqida ogohlantirishlar osilgan.
Jahondagi vaziyat
Eron parlamentining 100 nafar a’zosi COVID-19 aniqlash uchun test topshirgan, ularning 5 nafarida tahlil natijalar ijobiy chiqqan. OAV parlament deputatlaridan biri — Muhammad Ali Ramazoniy Dastak koronavirusdan vafot etgani haqida xabar bergan.
Ma’lumot uchun, Eron hukumati vakillari orasida koronavirus epidemiyasi sog‘liqni saqlash vaziri o‘rinbosari Iraj Xarirchidan boshlangan edi. Shundan so‘ng Eron vitse-prezidenti Ma’suma Ebtekar ham koronavirusga chalingani xabar qilindi. Avvalroq Eronning Vatikan va Eron davlatlaridagi sobiq elchisi Xadi Xisravshohiy koronavirus bilan kasallanib, vafot etgani haqida xabar berilgandi. So‘nggi ma’lumotga ko‘ra, Eronda 593 kishi koronavirusni yuqtirib olgan, 43 kishi vafot etgan.
Moskvada koronavirus yuqtirib olish bo‘yicha birinchi holat kuzatildi. “Rospotrebnadzor” ushbu ma’lumotni tasdiqlagan. Koronavirusga chalingan bemor rossiyalik David Berovning ushbu kasallikni Italiyadan yuqtirib kelgani aytilmoqda.
Armanistonda COVID-19 koronavirusi infeksiyasini yuqtirib olish bo‘yicha birinchi holat kuzatildi, deb yozgan mamlakat bosh vaziri Nikol Pashinyan Facebook’dagi sahifasida.
Yaponiyaning 47 ta prefekturasining yarmida COVID-19 koronavirus infeksiyasi bilan kasallanish holati tasdiqlandi. Qayd etilishicha, kasallanganlarning umumiy soni 942 kishini tashkil etayotgan bo‘lib, ularning 705 nafari Diamond Princess kruiz kemasidan tushgan fuqarolardir.
AQShda koronavirusdan ikkinchi o‘lim holati qayd etildi. Kasallik 70 yoshli erkakda aniqlangan. U 29-fevral, shanba kuni, Vashingtondagi EvergreenHealth kasalxonasida vafot etgan. Avvalroq shu kasalxonada 50 yoshli ayol vafot etgandi. Koronavirus yuqtirib olgan yana 4 nafar bemor og‘ir holatda. Umumiy hisobda AQShda koronavirusni yuqtirib olganlar soni 60 kishini tashkil etmoqda.
AQSh fond bozori 28-fevral, juma kuni, ochilganidan keyin kotirovkalarda keskin pasayish kuzatildi. S&P 500’ning indeksi 3,09 foizni tashkil qildi, Dow Jones indeksi esa 3,52 foizga tushdi. Rossiyada bundan ham yomonroq holat qayd etilgan. Moskva birjasida pasayish 4,98 foizni tashkil qilmoqda, RTS dollar indeksi esa 6,5 foizga tushgan.
Mavzuga doir: Koronavirus sababli jahon yalpi ichki mahsulotining yo‘qotishlari 1 trln dollarga yetishi mumkin
Brent markasidagi neft narxi 2,5 yil avval may oyida bir barrel uchun 49 dollardan ham arzonlashgandi. 28-fevraldagi savdolarda Brent markasidagi qora oltin narxi 48,95 dollar deb baholandi va avvalgi savdolardagi ko‘rsatkichdan 5,37 foizga pasaydi.
Dunyo bo‘ylab birja indekslarining pasayishi oqibatida so‘nggi bir hafta davomida sayyoraning eng badavlat 500 odami 444 milliard dollar yo‘qotdi. Ko‘rilgan zararlar qiymati yil boshidan beri olingan barcha daromadlardan oshib ketgan.
Eng katta aviakompaniyalardan biri bo‘lgan Emirates Airlines koronavirus tarqalishi sabab vujudga kelgan iqtisodiy muammolar tufayli o‘z xodimlaridan ta’tilga chiqishni so‘radi. Hujjatda koronavirus sabab kompaniyaning biznesda jiddiy moliyaviy sustlashishi kuzatilgani qayd etilgan. Shuningdek, shu munosabat bilan xodimlarga to‘lov ko‘zda tutilgan ta’til olish tavsiya qilingan. Tezkor faoliyat bilan shug‘ullanmaydigan xodimlarga esa o‘z hisobidan ta’til olish so‘ralgan. Ma’lumot uchun, Emirates Xitoyning Pekindan tashqari qismiga parvozlarni bekor qilgan. Shuningdek, Eronga ham parvozlar vaqtincha to‘xtatilgan.
Koronavirus epidemiyasining kutilmagan ijobiy jihati haqida ma’lumot berildi. Xitoydagi fabrika va zavodlarda ish to‘xtagani, avtomobillardan atmosferaga chiqayotgan chiqindilarning kamayganligi koronavirus tarqalishining ijobiy jihatlaridan biriga aylandi.
JSST bosh direktori Tedros Gebreyesus kasallikka qarshi vaksinalarning dastlabkilari bir necha hafta ichida chiqishini ma’lum qildi. “Dunyoda 20 dan ortiq vaksina ishlab chiqilmoqda va bir qator dorilarning klinik tadqiqotlari olib borilmoqda”, — deya qo‘shimcha qildi tashkilot rahbari. Tashkilot koronavirusning global xavfini “juda yuqori” darajaga ko‘tardi.
Koronavirus chivin chaqishidan yuqadimi? Butun dunyoda og‘ir epidemiologik vaziyatni yuzaga keltirgan COVID-19 koronavirusi chivin yoki pashsha chaqishi oqibatida yuqmaydi. Jahon sog‘liqni saqlash tashkiloti vakillari ham ushbu ma’lumotni rasman tasdiqlagan. Ma’lumotlarga ko‘ra, respirator virus asosan havo-tomchi yo‘li orqali yuqadi.
Sportdagi vaziyat
Eronda yangi ko‘rinishdagi koronavirus sababli mini futbol bo‘yicha professional futzalchi Elham Shayxi hayotdan ko‘z yumdi.Ta’kidlanishicha, 23 yoshli Shayxi bundan 10 kun muqaddam shifoxonaga yotqizilgan va 26-fevral, chorshanba kuni, vafot etgan. Shu tariqa u COVID-19 virusi bois hayotdan erta ko‘z yumgan birinchi futzalchi sifatida tarixda qoldi.
Xitoyda tarqalgan koronavirus Tokio—2020 Olimpiadasining o‘tkazilishiga ta’sir qilmaydi. Bu haqda Olimpiya o‘yinlari ijroqo‘mi bosh direktori Katsura Enyo ma’lum qildi. “Tokiodagi Olimpiya o‘yinlari o‘tkazilishiga hech qanday o‘zgartirish kiritilmaydi. Musobaqani bekor qilishi yoki qoldirish borasida esa o‘ylayotganimiz ham yo‘q. Menda bu borada hech qanday fikr yo‘q”, — deya Enyo so‘zlarini keltirmoqda “TASS”.
Nemis futbolida koronavirus sabab ehtiyot choralari ko‘rilmoqda: “Bavariya” futbolchilariga muxlislar bilan suratga tushish taqiqlandi. Futbol bo‘yicha Italiya chempionatining 26-turidan o‘rin olgan beshta uchrashuv ham koronavirus sabab boshqa muddatga qoldirildi. Umuman olganda mart oyidagi xalqaro futbol uchrashuvlari bo‘sh tribunalarda o‘tishi mumkin. FIFA prezidenti Janni Infantino koronavirus tarqalishi sababli mart oyidagi xalqaro uchrashuvlarning bo‘sh tribunalarda o‘tishi mumkinligini istisno qilmadi.
Koronavirus sabab “Yuventus”—“Inter” va A Seriyaning yana to‘rtta futbol o‘yini tomoshabinlarsiz o‘tdi. Avvalroq “Paxtakor”ning OChLdagi o‘yini ham mazkur sabab qoldirilgani haqida xabar berilgandi.
Izoh (0)