Afg‘oniston terma jamoasi Rossiya bilan o‘rtoqlik uchrashuvi o‘tkazishi mumkin. Bu haqda Bombardir nashri xabar berdi.
Afg‘oniston futbol federatsiyasi matbuot kotibi Mustafo Hoshimiyning ma’lum qilishicha, mamlakat milliy terma jamoasi Rossiya bilan o‘rtoqlik uchrashuvi o‘tkazishga tayyor:
Bizning delegatsiyamiz yaqinda Rossiyada bo‘ldi va Afg‘oniston sport vazirligi vakillari Rossiya sport vaziri bilan muzokaralar o‘tkazdi. Milliy terma jamoalar o‘rtasida o‘rtoqlik uchrashuvi o‘tkazish g‘oyasi — ajoyib. Biz Rossiya davlatiga samimiy munosabatdamiz. Qolaversa, bosh murabbiyimiz Vinchenzo Alberto Annese janoblarining turmush o‘rtog‘i rossiyalik, — dedi Hoshimiy.
Uning so‘zlariga ko‘ra, o‘rtoqlik uchrashuvi tashkiliy jihatdan hali muhokama bosqichida:
Bizning jamoa o‘ynashga tayyor, biroq bu masalani har ikki mamlakat futbol federatsiyasi rahbarlari muhokama qilishi lozim. Shundan so‘ng o‘yin sanasi va joyi belgilanadi. Shuningdek, bu borada bosh murabbiy bilan ham kelishuvga erishish kerak. Agar Rossiya raqib izlayotgan bo‘lsa va Afg‘onistonga qarshi bahs o‘tkazishga tayyor bo‘lsa, biz bu taklifni ko‘rib chiqamiz, — dedi u.
Ma’lumot o‘rnida, Afg‘oniston milliy terma jamoasi FIFA reytingida 160-o‘rinni egallab turibdi. Ular so‘nggi uchrashuvini Osiyo Kubogi saralashi doirasida Suriyaga qarshi o‘tkazib, 0:1 hisobida imkoniyatni boy bergan.
Izoh (0)