O‘zbekiston tarixda ilk marotaba BMTning Oziq-ovqat va qishloq xo‘jaligi tashkiloti (FAO) kengashiga bir ovozdan saylandi. Bu haqda Tashqi ishlar vazirligi xabar berdi.
Unda aytilishicha, 4-iyul kuni Rimda bo‘lib o‘tgan Birlashgan Millatlar Tashkilotining Oziq-ovqat va qishloq xo‘jaligi tashkiloti (FAO) kengashining 2028—2029-yillarga mo‘ljallangan a’zoligiga saylovda O‘zbekiston tarixida birinchi marta ushbu nufuzli organ tarkibiga bir ovozdan saylandi.
Kengash geografik taqsimotni hisobga olgan holda 3 yilgacha muddatga saylanadigan 49 ta a’zo davlatdan iborat. Kengash o‘z vakolatlari doirasida byudjet, FAO dasturlarini muhokama qiladi va konferensiyaga muhim qarorlar va tavsiyalar beradi.
“O‘zbekistonning mazkur organga saylangani prezident rahbarligida qishloq xo‘jaligi va oziq-ovqat xavfsizligi sohasida amalga oshirilayotgan o‘zgarishlar va mamlakatning global jarayonlardagi roli ortib borayotgani xalqaro miqyosda e’tirof etilganining yorqin ifodasidir.
FAO kengashiga a’zolik O‘zbekiston uchun global qishloq xo‘jaligi va oziq-ovqat siyosatini shakllantirish, me’yoriy hujjatlar va standartlarni ishlab chiqish, milliy va mintaqaviy tashabbuslarni taqdim etish, shuningdek, loyihalarni ilgari surish va qo‘shimcha moliyaviy resurslarni jalb qilishda keng imkoniyatlar ochadi”, deyiladi xabarda.
Prezident Shavkat Mirziyoyev 2024-yil 5-sentyabr kuni BMTning Oziq-ovqat va qishloq xo‘jaligi tashkiloti (FAO) bosh direktori Syuy Dunyuyni qabul qilgan edi.
Suhbat davomida O‘zbekiston va FAO o‘rtasidagi zamonaviy xavf-xatar va tahdidlarga qarshi samarali chora ko‘rish borasidagi strategik sheriklikni yanada kengaytirish masalalari muhokama qilingandi.
2025-yilgacha bo‘lgan davrda hamkorlik bo‘yicha mamlakat dasturini bajarish sifat ko‘rsatkichlari ikki barobar yaxshilandi. Hozirda 34 ta loyiha faol amalga oshirilmoqda. O‘tgan bir yil ichida dehqonchilik, maktablarda ovqatlanish, veterinariya, agrokimyo va boshqa sohalarda 7 ta yangi loyiha ishga tushirildi.
Izoh (0)