Birlashgan Millatlar Tashkiloti G‘arbiy va Markaziy Afrikada narxlarning oshishi sababli, yaqin oylarda 55 millionga yaqin odam ocharchilik bilan kurashishga to‘g‘ri kelishi haqida ogohlantirdi.
12-aprel kuni Jahon oziq-ovqat dasturi (WFP), BMTning bolalar agentligi UNICEF va Oziq-ovqat va qishloq xo‘jaligi tashkiloti (FAO) qo‘shma bayonotida ocharchilikka duchor bo‘lganlar soni so‘nggi besh yil ichida to‘rt baravar ko‘payganini ma’lum qilgan.
Bayonotga ko‘ra, ikki raqamli inflyatsiya va mahalliy ishlab chiqarishning turg‘unligi kabi iqtisodiy muammolar inqirozning asosiy omiliga aylangan. Xabarda Nigeriya, Gana, Syerra-Leone va Mali eng ko‘p zarar ko‘rishi qayd etilgan.
Ma’lum bo‘lishicha, asosiy don mahsulotlari narxi mintaqa bo‘ylab besh yillik o‘rtacha ko‘rsatkichga nisbatan 10 foizdan 100 foizga ko‘tarilishda davom etgan.
Harakat qilish vaqti keldi. Vaziyat nazoratdan chiqib ketishiga yo‘l qo‘ymaslik uchun barcha hamkorlar faollashishi lozim. G‘arbiy Afrika kelajagi uchun ko‘proq sarmoya kiritishimiz kerak, — deydi Margot Vandervelden, WFP ning G‘arbiy Afrika bo‘yicha mintaqaviy direktori vazifasini bajaruvchi.
Oziq-ovqat tanqisligi bolalarga ayniqsa xavfli ta’sir ko‘rsatgan. Agentliklarning ta’kidlashicha, olti oydan 23 oygacha bo‘lgan har 10 boladan sakkiztasi o‘sish va rivojlanish uchun zaruriy miqdorda oziq-ovqat iste’mol qilmaydi.
Shuningdek, besh yoshgacha bo‘lgan qariyb 16,7 million bola to‘yib ovqatlanmaydi va har uch oiladan ikkitasi sog‘lom ovqatlanish imkoniyatiga ega emas.
Izoh (0)