Fransiya prezidenti Emmanuel Makron kelgusi ikki yil ichida harbiy xarajatlarni 6,5 milliard yevroga oshirishga va’da berdi. U Rossiya tomonidan bo‘layotgan tahdidlar bunga sabab bo‘layotganini aytdi. Bu haqda Financial Times xabar berdi.
Makronning so‘zlariga ko‘ra, 2026-yilgi mudofaa byudjeti 3,5 milliard yevroga, 2027-yilda esa yana 3 milliard yevroga oshadi. Bu avvalroq rejalashtirilgan 110 milliard yevrodan taxminan 6 foizga o‘sishni anglatadi.
1945-yildan buyon erkinlik hech qachon bu darajada jiddiy tahdid ostida bo‘lmagan. Bu dunyoda ozod bo‘lish uchun — bizdan qo‘rqishlari kerak. Buning uchun kuchli bo‘lishimiz kerak, degan Fransiya prezidenti.
2026-yilgi byudjet rejasida mudofaa sohasi qo‘shimcha mablag‘ oladigan yagona yo‘nalish bo‘lishi kutilmoqda. Fransiya hukumati byudjet taqchilligini kamaytirish maqsadida xarajatlarni qisqartirish va soliqlarni oshirish orqali 40 milliard yevrogacha moliyaviy choralarni ishlab chiqmoqda.
Yevropa davlatlari o‘z mudofaa salohiyatini mustahkamlashga ko‘proq e’tibor qaratmoqda. Bu AQSH prezidenti Donald Trampning Yevropa o‘z xavfsizligini o‘zi ta’minlashi kerak degan talabidan so‘ng yanada kuchaydi.
Shu sababli, iyun oyida NATO davlatlari o‘rtasida mudofaa xarajatlarini yalpi ichki mahsulotning 3,5 foizigacha oshirish bo‘yicha tarixiy kelishuvga erishildi. Bu ko‘rsatkich NATOga a’zo 32 davlatning qariyb uchdan ikki qismida, jumladan Fransiyada ham, hozirda qo‘llanilayotgan an’anaviy 2 foizlik maqsaddan ancha yuqori.
Makron Yevropa Ittifoqi mintaqaviy mudofaani kuchaytirish uchun ittifoq bo‘yicha birgalikda qarz olish mexanizmini yo‘lga qo‘yish zarurligini ilgari surmoqda. Biroq Germaniya bu tashabbusga qarshi chiqmoqda. Buning o‘rniga, mamlakatning o‘zi qo‘shimcha qarz olish yo‘li bilan mudofaa xarajatlarini moliyalashtirishni boshladi.
Yevrostat ma’lumotlariga ko‘ra, 2024-yil oxiriga kelib, Germaniyada davlat qarzining YIMga nisbati 62,5 foizni tashkil etgan; Fransiyada esa bu ko‘rsatkich 113 foizga yetgan, bu bilan u faqat Gretsiya va Italiyadan ortda qolmoqda.
Izoh (0)