Netflix’ning mashhur seriali “Kalmar o‘yini”ning yakuniy uchinchi mavsumi katta shov-shuv bilan taqdim etildi. Premyeradan so‘ng atigi uch kun ichida yangi fasl 60,1 million marta tomosha qilindi. Bu ko‘rsatkich uni qisqa muddat ichida eng ko‘p ko‘rilgan serialga aylantirdi. Ushbu ma’lumotni Netflix o‘zining yangilangan top-10 reytingida e’lon qildi.
Shu tariqa, “Kalmar o‘yini” Netflix tarixidagi eng mashhur ingliz tilida bo‘lmagan shoular orasida to‘qqizinchi o‘rinni egalladi. Serialning ikkinchi mavsumi ham o‘z vaqtida yuqori natijalarga erishgan — premyeradan keyingi dastlabki to‘rt kun ichida 68 million marta ko‘rilgan va ilk haftasidayoq reytingda birinchi o‘ringa chiqqan. Bu natija hatto ilgari yetakchilik qilgan “Uenzdey” serialidan (50,1 million ko‘rish) ham yuqori bo‘lgan edi.
Ma’lumot uchun, Netflix haftalik reytingni dushanbadan yakshanbagacha tuzadi. Ikkinchi faslga to‘rt kunlik ko‘rishlar kirgan bo‘lsa, uchinchi faslda bu muddat uch kun bilan cheklangan. Shunga qaramay, serialning yangi fasli juda muvaffaqiyatli boshlangan.
Uchinchi fasl syujeti bosh qahramon Son Gi Xun atrofida davom etadi. U yana shafqatsiz o‘yinga aralashishga majbur bo‘ladi. Biroq bu safar uning maqsadi faqat tirik qolish emas, balki o‘yin tizimiga qarshi kurashish, qoidalarni o‘zgartirish va insoniylik hali yo‘qolmaganini isbotlashdir.
Izoh (0)