AQSH tashqi yordamini to‘xtatishi tufayli dunyo bo‘ylab 14 milliondan ortiq odam halok bo‘lishi mumkin. Ularning uchdan bir qismini yosh bolalar tashkil etadi. Bu haqda Al Arabiya xabar berdi.
Tegishli ma’lumot nufuzli Lancet jurnalidagi tadqiqotda e’lon qilingan. Mutaxassislar 113 ta mamlakatdan olingan ma’lumotlarni taqdim qilgan. Unga ko‘ra, AQSH Xalqaro taraqqiyot agentligi (USAID) mablag‘lari 2001—2021-yillarda rivojlanayotgan mamlakatlarda 91 million o‘limning oldini olgan.
Tadqiqotda mazkur moliyalashtirishning 83 foizga qisqarishi o‘lim darajasiga qanday ta’sir etishi prognoz qilingan. Jumladan, bu 2030-yilga kelib 14 milliondan ortiq o‘limga sabab bo‘lishi mumkin. Bu raqam 5 yoshgacha bo‘lgan 4,5 milliondan ortiq bolani yoki yiliga 700 mingga yaqin bola o‘limini o‘z ichiga oladi. Taqqoslash uchun, Birinchi jahon urushi paytida 10 millionga yaqin askar halok bo‘lgandi.
USAID mablag‘lari ayniqsa o‘lim holatlarining oldini olishda muhim ekani aniqlangan. Tadqiqot shuni ko‘rsatdiki, USAID tomonidan yuqori darajada qo‘llab-quvvatlanadigan mamlakatlarda OIV/OITSdan o‘lim holatlari 65 foizga kamroq bo‘lgan. Bezgak va tropik kasalliklardan o‘lim ham ikki baravar kamaygan.
“Moliyalashtirishni kamaytirish zaif aholi orasida tibbiyot sohasidagi yigirma yillik taraqqiyotni to‘xtatadi va hatto yo‘q qilib yuboradi. Bu ko‘plab past va o‘rta daromadli mamlakatlar uchun kuchli ‘shok’ keltirib chiqaradi”, deydi Barselona global sog‘liqni saqlash instituti tadqiqotchisi, tadqiqot hammuallifi Davide Rasella
Yanvar oyida Donald Tramp prezidentlikka qaytguniga qadar USAID 40 foizdan ortiq gumanitar mablag‘larni tarqatgan. Ikki hafta o‘tgach, Trampning o‘sha paytdagi eng yaqin maslahatchisi, milliarder Ilon Mask USAID’ni qattiq nazorat ostiga olganini aytgandi.
USAID’dan so‘ng Germaniya, Buyuk Britaniya va Fransiya kabi bir qancha yirik “donorlar” ham o‘zlarining tashqi yordam byudjetlarini qisqartirish rejalarini e’lon qilgandi.
Iyul oyining birinchi haftasida Ispaniyada BMTning yordam ko‘rsatish sohasiga bag‘ishlangan konferensiyasi bo‘lib o‘tishi rejalashtirilgan. Yuqoridagi chop etilgan tadqiqot ushbu yig‘ilishda yordam masalasiga urg‘u berish uchun ommaga taqdim etilgan.
Izoh (0)