AQSH Xalqaro Taraqqiyot agentligi (USAID) O‘zbekistonda maktab darsliklarini sifatini yaxshilash maqsadida to‘rt yilga mo‘ljallangan 29 million dollarlik grand mablag‘lari yo‘naltirilmoqda. Bu haqda “O‘zbekiston barkamollik uchun” ta’lim dasturi Bosh direktor o‘rinbosari Zuhra Soliyeva “Daryo”ga ma’lum qildi.
Zuhra Soliyevaning aytishicha, ajratilgan grand mablag‘lari to‘rt yil davomida o‘quv-metodik majmualarni ishlab chiqish, tajriba-sinov o‘tkazish va nashr ishlari uchun sarflanadi.
“Loyiha doirasida to‘rtta yo‘nalishda ish olib borilmoqda. Birinchi yo‘nalishimiz — ingliz tili 1–11-sinflarni qamrab olgan, informatika va axborot texnologiya fani 5–11-sinflarni qamrab oladi, ona tili va o‘qitish savodxonligi, matematika fanlari boshlang‘ich sinf o‘quvchilari uchun mo‘ljallangan. Bundan tashqari, informatika hamda ingliz tili fanlari va Kembrij nashriyoti tomonidan ishlab chiqilgan darsliklarning litsenziyasini sotib olib, O‘zbekistonga olib berdik”, — dastur bo‘yicha ma’sul xodim.
Uning qo‘shimcha qilishicha, hozirga qadar ikkita yo‘nalishdagi ishlar o‘z nihoyasiga yetmoqda.
Ta’kidlanishicha, 1–4-sinflar uchun ona tili va o‘qish savodxonligi hamda matematika fanlari bo‘yicha yangi darsliklar va o‘qituvchilar uchun qo‘llanmalar ishlab chiqilmoqda.
Yangi o‘quv-metodik majmualar iyun oyining boshiga qadar yakunlanadi va tasdiqlash uchun Xalq ta’limi vazirligiga taqdim etiladi. USAID Xalq ta’limi vazirligi bilan hamkorlikda ushbu yangi o‘quv-metodik majmualarni 2022/2023-o‘quv yilida Namangan va Sirdaryo viloyatlaridagi 918 ta maktabda tajriba sinovdan o‘tkazadi.
Avvalroq AQSH Xalqaro taraqqiyot agentligi (USAID) Namangan va Sirdaryo viloyatlarining 208 ta umumta’lim maktablariga 385 ming dona darslik va o‘qituvchilar uchun qo‘llanmalarni taqdim etgani, o‘zbekistonlik 38 nafar o‘quvchi Bo‘lajak liderlar almashinuvi dasturi doirasida 2006-yildan beri birinchi marta Amerikaga yuborilishi to‘g‘risida xabar berilgandi.
Izoh (0)