Bugun AQSH Xalqaro taraqqiyot agentligi (USAID) O‘zbekistonda o‘g‘it ishlab chiqarish va sotuv hajmini ko‘paytirish maqsadida O‘g‘itlarni ishlab chiqarish va ulardan samarali foydalanishni qo‘llab-quvvatlash jamg‘armasi ishga tushirilganini e’lon qildi.
Ushbu jamg‘arma agrobiznesni qo‘llab-quvvatlash hamda oziq-ovqat mahsulotlari narxining barqarorligini ta’minlashga qaratilgan. Mazkur dastur doirasida O‘zbekistonning bir qator xususiy tarmoqdagi o‘g‘it ishlab chiqaruvchilari to‘rt milliard so‘mgacha bo‘lgan yangi uskunalar xarid qilishlari va/yoki malakasini oshirish uchun individual treningdan o‘tish imkoniyatiga ega bo‘ladi. Dasturda ishtirok etish uchun ariza topshirish talab etiladi. Ariza hujjatlari namunalari ilovada keltirilgan.
“Dunyo miqyosida o‘g‘itlar narxi pandemiya boshlanganidan beri deyarli ikki baravar oshdi, bu esa o‘z navbatida oziq-ovqat narxlarining ko‘tarilishiga olib keldi. Agar fermerlar sifatli o‘g‘itlardan foydalana olishsa, oziq-ovqat mahsulotlari narxi pasayib, ishlab-chiqarish ko‘payadi, bu esa qishloq xo‘jaligi sohasining yuksalishiga xizmat qiladi”, - deydi USAID’ning O‘zbekistondagi missiyasi direktori Mikaela Meredit. “USAID agrobizneslarga o‘g‘it ishlab chiqarish va ularning sifatini oshirish uchun yangi texnologiyalardan foydalanishda yordam berish hamda fermerlarga o‘g‘itdan samaraliroq foydalanishni o‘rgatishni o‘z oldiga maqsad qilib qo‘ygan”.
Joriy yilning avgust oyida USAID O‘zbekiston fermerlari va o‘g‘it ishlab chiqaruvchilarni qo‘llab-quvvatlash orqali oziq-ovqatning arzonligini ta’minlash uchun qiymati ikki million AQSH dollariga teng ko‘mak ko‘rsatishini e’lon qilgan edi. Bu mablag‘ning qariyb yarmi O‘g‘itlarni ishlab chiqarish va ulardan samarali foydalanishni qo‘llab-quvvatlash jamg‘armasi orqali taqsimlanadi. Yangi mablag‘ 2022 yilning iyun oyida bo‘lib o‘tgan G7 sammitida AQSH Prezidenti Bayden tomonidan e’lon qilingan global oziq-ovqat inqirozi ta’sirini bartaraf etish uchun AQSH tomonidan ajratilgan jami 2,76 milliard dollarlik mablag‘ning bir qismidir.
USAID O‘zbekiston Respublikasi prezidenti Shavkat Mirziyoyevning oziq-ovqat xavfsizligini ta’minlash bo‘yicha olib borayotgan sa’y-harakatlari doirasida mamlakatning oziq-ovqat xavfsizligini ta’minlash borasidagi salohiyatini oshirish orqali o‘zini-o‘zi ta’minlash borasidagi intilishlarini qo‘llab-quvvatlaydi.
USAID O‘zbekistondagi o‘g‘it ishlab chiqaruvchilarga o‘g‘itlarni ishlab chiqarish, sotuvni yaxshilash hamda ko‘paytirish orqali ularning mahalliy va/yoki mintaqaviy bozordagi ulushini oshirish uchun yangi texnologiyalarni joriy etishda texnik ko‘mak beradi va investitsiyalarni birgalikda moliyalashtiradi. Shuningdek USAID 5000 nafar fermer va ekstenshn agentlari uchun o‘g‘itlardan foydalanishda ilg‘or tajribalar bo‘yicha treninglar tashkil etadi.
Loyiha doirasida o‘g‘itlarni ishlab chiqarish va sotishni yaxshilash va/yoki ko‘paytirish uchun to‘rt milliard so‘mgacha mablag‘ ajratishni talab qiluvchi arizalar ko‘rib chiqiladi. Granulali, suvda eruvchan va/yoki suyuq NPK o‘g‘itlarini ishlab chiqarishni yaxshilash va/yoki ko‘paytirishga qaratilgan arizalarga alohida e’tibor qaratiladi. Shuningdek, organik o‘g‘it ishlab chiqarish konsepsiyasi ham qo‘llab-quvvatlanadi. Arizalar 2022-yilning 1-dekabrigacha qabul qilinadi. E’lon va arizalar namunasini bu yerdan yuklab olish mumkin.
Izoh (0)