AQSH Xalqaro taraqqiyot agentligi (USAID) hamkorlari xotin-qizlarning IT sohasidagi yutuqlari hamda Tumaris.Tech va FoundHer loyihalari natijalarini namoyish etish uchun Toshkentdagi IT Parkda to‘plandi. Bu haqda AQSHning O‘zbekistondagi elchixonasi matbuot xizmati xabar berdi.
2020-yilning iyunida IT Park tomonidan va USAID’ning tadbirkorlik va biznes muhitini rivojlantirish bo‘yicha loyihasi ko‘magida ishga tushirilgan Tumaris.Tech loyihasi axborot texnologiyalari sektorida tadbirkor xotin-qizlarning imkoniyatlarini kengaytirish bo‘yicha innovatsion dastur hisoblanadi. O‘tgan ikki yil davomida Tumaris.Tech loyihasi nafaqat O‘zbekiston hududida, balki Markaziy Osiyo davlatlaridan ham ishtirokchilarni jalb etib, 200 dan ortiq xotin–qizni o‘qitish, 46 ta startap loyihasini qo‘llab-quvvatlash va 50 ta texnologik mahsulotni ishga tushirish orqali o‘z faoliyati geografiyasini kengaytirdi.
Xotin-qizlarning tadbirkorligini rivojlantirishga yo‘naltirilgan FoundHer loyihasi O‘zbekistonda istiqbolli biznes g‘oyalarni izlash bilan shug‘ullanib, olti oy davomida biznesni rivojlantirishga hissa qo‘shgan. FoundHer loyihasi Markaziy Osiyoda axborot texnologiyalari sohasida xotin-qizlar uchun teng shart-sharoitlarni yaratishga sodiqligini namoyish etib, treninglar va murabbiylikni tashkillashtirishga ko‘maklashgan, buning natijasida loyiha ishtirokchilarining Kremniy vodiysiga safari hamda AQSHda 2023-yildagi Qishki sammitda ishtiroki taʼminlangan.
USAID’ning gender tenglik hamda xotin-qizlarning huquq va imkoniyatlarini kengaytirish bo‘yicha bosh muvofiqlashtiruvchisi Jamila Bijio tadbirda ishtirok etib, loyihalarning yutuqlari va natijalaridan mamnun ekanini bildirgan.
Bundan oldin USAID’ning O‘zbekistondagi missiyasiga yangi rahbar tayinlangani, USAID Toshkentda ekologik g‘oyalar bo‘yicha talabalar tanlovi g‘oliblarini taqdirlagani, AQSH xalqaro taraqqiyot agentligi O‘zbekistonga 131 tonna oziq-ovqat yordami yetkazib bergani ma’lum qilingandi.
Izoh (0)