“Real Madrid” jamoasi rahbariyati 2026-yil yozida shartnomasi yakunlanadigan to‘rt futbolchi — Dani Karvaxal, Antonio Ryudiger, David Alaba va Tibo Kurtua bilan bog‘liq masalasi jiddiy muhokama qilmoqda. Bu haqda Ispaniyaning AS nashri xabar berdi. Manbaga ko‘ra, klub rahbariyati yaxshi taklif tushsa, Antonio Ryudigerni qo‘yib yuborish variantini istisno qilmayapti. Germaniyalik himoyachi Saudiya Arabistoni chempionatiga o‘tishi mumkinligi aytilmoqda. Hozirda ushbu mamlakatning bir nechta jamoalari himoyachiga qiziqish bildirmoqda. David Alaba jamoaning eng yuqori maosh oluvchi futbolchilaridan biri sanalsa-da, ketma-ket jarohatlar sabab asosiy tarkibdagi o‘rnini yo‘qotib qo‘ygan. Avstriyalik futbolchi yangi mavsumda markaziy himoyadagi beshinchi futbolchiga aylanishi mumkin. Ammo futbolchi 2026-yilgi Jahon chempionatiga optimal formada borishni istamoqda. Bu holatda u jamoadan ketishi kerak bo‘ladi. “Qirollik klubi” ham futbolchini sotishga qarshi emas. Ular bu orqali jamoadagi maoshlar borasidagi muvozanatni tiklamoqchi. Dani Karvaxalning holati esa ancha murakkab. Uning o‘rniga “Liverpul”dan Trent Aleksander-Arnold olib kelingani fonida tajribali futbolchi jamoaning ikkinchi raqamli qanot himoyachisiga aylandi. Shunga qaramay, Karvaxal jamoadagi birinchi sardor sanaladi va bu omil uning “Real”da qolish ehtimolini oshiradi. Biroq yaxshi taklif tushsa, klubning Dani bilan xayrlashish ehtmoli ham yo‘q emas. Klub Tibo Kurtua bilan shartnomani odatdagidan farqli ravishda bir yilga emas, ikki yilga uzaytirishni rejalashtirmoqda. Belgiyalik darvozabonning barqaror o‘yinlari unga bo‘lgan ishonchni yanada mustahkamlab bergan.
Mavzuga doir
×![Lightbox Image]()
Izoh (0)