Luka Modrich ushbu mavsum yakunida “Real Madrid”ni tark etishini rasman e’lon qildi. Klublar o‘rtasidagi Jahon chempionati uning “Real” libosida harakat qilgan so‘nggi turniri bo‘ladi.
Modrich 13 yil davomida Madrid klubida faoliyat yuritdi. U 26 yoshida klubga kelib, 39 yoshigacha jahonning eng kuchli va yulduz futbolchilar jamoasida o‘ynadi. Uning “Real”dagi faoliyati — cheksiz buyuklik va hayratlanarli fidoyilik namunasidir. Deyarli 600 o‘yin o‘yin o‘tkazgan Luka jamoaning eng ko‘p sovrin qo‘lga kiritgan (28 ta) futbolchisi sifatida tarixda qoldi.
Keling, uning eng muhim va unutilmas lahzalarini yodga olamiz.
Buyuklik sari yo‘l 2012-yil avgustda boshlandi.
2012-yil yoz faslining so‘nggi kunlarida uzoq davom etgan muzokaralardan so‘ng Modrich “Tottenxem”dan 22,5 million yevro evaziga “Real”ga o‘tdi. Transferdan ikki kun o‘tib, u Ispaniya Superkubogi doirasida “Barselona”ga qarshi o‘yin o‘tkazdi va jamoasining 2:1 hisobidagi g‘alabasida ishtirok etdi. Bu uning “Real”dagi birinchi sovrini bo‘ldi — 36 soat ichidayoq yangi jamoadagi ilk titul qo‘lga kiritildi.
Biroq, uning Madriddagi faoliyati oson kechmadi. Modrich Mourinyoning tizimiga moslashishda qiynaldi va ko‘p o‘yinlarda zaxirada o‘tirishiga to‘ri keldi. 2012-yil oxirida Marca nashri uni mavsumning eng yomon transferi sifatida baholadi — hozir esa bunga ishonish qiyin.
Lekin Modrich birinchi mavsumida ham yorqin lahzalarni namoyish etdi. 2013-yil mart oyida u “El Klasiko”da birinchi golli uzatmasini amalga oshirdi: Luka burchak zarbasini ijro etdi, Serxio Ramos gol kiritdi — “Real” 2:1 hisobida g‘alaba qozondi. Keyinchalik bu muvaffaqiyatlar takrorlanaverdi.
Biroz o‘tib, xorvatiyalik futbolchi UEFA Chempionlar ligasida ham o‘zini ko‘rsata boshladi. U “Manchester Yunayted”ga qarshi kechgan 1/8 final javob o‘yinida uzoq masofadan chiroyli gol urib, hisobni tenglashtirdi. “Real” oxir-oqibat keyingi bosqichga chiqdi, ammo yarim finalda “Borussiya Dortmund”ga mag‘lub bo‘ldi. Modrich esa mutaxassislarda yaxshi taassurot qoldira boshladi.
Keyingi mavsumda esa u yanada kuchliroq ekanini ko‘rsatdi. 2013/14-yilgi mavsumda klub bosh murabbiyi Karlo Anchelotti bo‘ldi va Modrich darhol asosiy futbolchilardan biriga aylandi. Uning buyukligini ko‘rsatgan birinchi voqea — o‘sha yilgi Chempionlar ligasining finali edi.
“Real” 12 yil ichida birinchi bor Yevropaning eng asosiy musobaqasida finalga yo‘l olgan edi va “Atletiko”ga qarshi bahsning so‘nggi daqiqalariga qadar 0:1 hisobida ortda qolayotgan edi. Modrich burchak zarbasidan to‘p uzatdi, Ramos 93-daqiqada g‘alaba golini urdi. “Real” o‘yinga qaytdi va qo‘shimcha bo‘limlarda “Atletiko”ni 4:1 hisobida mag‘lub etdi. Bu “Real” uchun o‘ninchi Chempionlar ligasidagi g‘alaba, Modrich uchun esa birinchisi edi.
Lekin Anchelotti keyingi mavsumda ishdan olindi, chunki klub sovrinsiz mavsum o‘tkazdi va barcha kuboklarni “Barselona” qo‘lga kiritdi. O‘sha mavsumda Modrich jiddiy jarohatlar tufayli jami 6 oy maydondan tashqarida bo‘ldi, bu esa Madrid jamoasi oyiniga jiddiy ta’sir o‘tkazdi.
Keyingi yillarda Luka ko‘proq o‘yinlarda maydonga tushdi va “Real” yana sovrinlarni qo‘lga kiritishni boshladi. 2015/16-yilgi mavsumida Zinedin Zidan murabbiy etib tayinlandi va u Chempionlar ligasidagi g‘alabalarni uzluksiz davom ettirdi. “Real” Zidan boshchiligida birinchi Chempionlar ligasi kubogini yana Madrid derbisida (1:1, penaltilar seriyasida 5:3) qo‘lga kiritdi. Bu Modrich uchun ikkinchi ChL sovrini bo‘ldi.
Keyingi yilda esa ularning soni uchtaga yetdi. 2016/17-yilgi mavsumda “Real” Ispaniya La ligasi va Yevropa Chempionalr ligasida zafar quchdi — Modrich ilk bor Ispaniya chempioni bo‘ldi. Finalda esa jamoa “Yuventus”ga imkon qoldirmadi. O‘sha mavsumda Yevropaning eng kuchli himoyasi 4 ta gol o‘tkazib yubordi, Modrich esa Ronalduning ikkinchi goliga assist amalga oshirdi.
Bunga qadar hech qaysi jamoa yangi formatdagi Chempionlar ligasida ketma-ket ikki bor g‘olib bo‘lmagan edi. Ammo “Real” buni ortig‘i bilan amalga oshirdi va 2017/18-yilgi mavsumda uchinchi bor musobaqa bosh sovrinini qo‘lga kiritdi. Modrich o‘sha mavsumning eng yaxshi futbolchisi deb topildi, Rossiyada o‘tgan Jahon chempionatida Xorvatiya bilan finalga qadar yetib borib, turnirning eng yaxshi futbolchisi sifatida “Oltin to‘p”ni qo‘lga kiritdi.
Modrich 11 ichida ilk bor Messi va Ronalduni ortda qoldirib, dunyoning eng yaxshi o‘yinchisiga atalgan “Oltin to‘p” sohibi bo‘ldi. Aynan Luka ularning yillar davomida o‘rnatgan hukmronligini to‘xtata oldi?
Biroq, Ronaldu “Real”ni tark etgach, jamoa qiyinchiliklarga duch keldi. Uning ketganidan keyingi ilk mavsumda jamoa, shu jumladan Modrich ham muvaffaqiyatsiz mavsum o‘tkazdi. Keyin sekin-asta jamoa tiklana boshladi va 2019/20-yilgi mavsumda La Liga zabt etildi.
2021-yilda Zidan ikkinchi bor klubni tark etdi va Modrich 36 yoshga to‘ldi. Bunga qo‘shimcha ravishda, Anchelotti jamoga bosh murabbiy etib tayinlandi, u ko‘pchilik fikricha eskirgan dunyoqarashga ega murabbiy edi. “Qirollik klubi” deyarli o‘n yil oldingi muvaffaqiyatlarni qayta tiklashga urinayotgandek taassurot qoldirdi.
Biroq, 2021/22-yilgi mavsumda “Real” yana Chempionlar ligasida zafar quchdi — bu klub tarixidagi o‘n to‘rtinchi, Modrich uchun esa beshinchi YChL kubogi edi. Luka chorak final doirasida “Chelsi”ga qarshi o‘yinda jamoani qutqardi — londonliklar uchrashuvda ustunlik qilayotgan, hisob esa 0:3 bo‘lgan vaqtda Modrich Rodrigoning goliga “trivela” uslubida uzatma berdi, hisob qisqardi – 1:3. Natijada “Real” o‘ziga keldi va ekstra-taymlardagi gol evaziga 2:3 hisobida mag‘lubiyatga uchrasa-da, dastlabki uchrashuvdagi g‘alaba (3:1) sabab yarim finalga yo‘l oldi.
Shundan keyin “Real” har qanday sharoitda Chempionlar ligasini yutishi mumkinligini ko‘rsatdi. 2023/24-yilgi mavsumda jamoa 15-marta YChL kubogini qo‘lga kiritdi. O‘sha mavsumda Luka maydonda katta rol o‘ynamagan bo‘lsa-da, finalda maydonga tushdi. U va Dani Karvaxal aynan shu davrda “Real”ning barcha Chempionlar ligasidagi final o‘yinlarida asosiy tarkibda maydonga tushgan futbolchilari sifatida tarixga kirishdi.
Bundan tashqari, “Real” Anchelottining ikkinchi davrida yana ikki marta La ligani yutdi. Modrich ham bu yo‘lda jamoaga beminnat yordam berdi.
Lukaning jamoa libosida qo‘lga kiritgan jami 28 ta tituli mavjud bo‘lib, bu klub rekordi hisoblanadi.
Modrich dunyoning eng mashhur klubi tarixida abadiy qoladi. Qo‘shimchasiga, u “Real” tarixidagi gol urgan eng keksa futbolchi sanaladi. 2025-yilning yanvar oyida “Valensiya” darvozasiga gol kiritganida xorvatiyalik futbolchi 39 yosh 115 kunlik edi.
Bu — murakkab transferdan boshlanib, “Oltin to‘p”, 6 ta YChL bosh sovrini hamda “Real” tarixidagi eng ko‘p sovrin yutgan futbolchisi maqomiga erishguncha bo‘lgan buyuk yo‘l edi. Faqat Luka Modrich bunga qodir edi.
Izoh (0)