Istanbulning “Fenerbahche” klubi bosh murabbiyi Joze Mourinyo “Manchester Yunayted” hujumchisi Markus Reshford bilan shaxsan bog‘lanib, uni o‘z jamoasida ko‘rishni istayotganini ma’lum qildi. Bu haqda Fotomac nashri xabar berdi.
Manbaga ko‘ra, murabbiy bilan bo‘lgan suhbat futbolchining fikrini o‘zgartirgan bo‘lib, Reshford bu taklifga jiddiy qaray boshlagan. Unda keltirilishicha, “Fenerbahche” dastlab uni ijaraga olib, keyinchalik to‘liq xarid qilish sharti bilan bitim tuzmoqchi.
Transfer amalga oshishi ehtimoli katta. Sababi, Reshford “Manchester Yunayted” bosh murabbiyi Ruben Amorimning rejalariga kirmaydi. Bundan tashqari, klubning yangi futbolchisi Mateus Kunya hujumchiga tegishli bo‘lgan 10-raqamni olgan. Bu esa Reshfordning yozda jamoani tark etishini yanada muqarrar qilmoqda.
Eslatib o‘tamiz, Reshford 2024-yilning ikkinchi yarmida “Manchester Yunayted”dan “Aston Villa”ga ijaraga berilgan edi. U Unai Emeri boshchiligidagi jamoada barcha turnirlar doirasidagi 17 o‘yinda maydonga tushib, 9 ta gol muallifiga aylangan. Transfermarkt portali 27 yoshli futbolchining qiymatini 50 million yevroga baholagan.
Izoh (0)