Истанбулнинг “Фенербаҳче” клуби бош мураббийи Жозе Моуриньо “Манчестер Юнайтед” ҳужумчиси Маркус Рэшфорд билан шахсан боғланиб, уни ўз жамоасида кўришни истаётганини маълум қилди. Бу ҳақда Fotomac нашри хабар берди.
Манбага кўра, мураббий билан бўлган суҳбат футболчининг фикрини ўзгартирган бўлиб, Рэшфорд бу таклифга жиддий қарай бошлаган. Унда келтирилишича, “Фенербаҳче” дастлаб уни ижарага олиб, кейинчалик тўлиқ харид қилиш шарти билан битим тузмоқчи.
Трансфер амалга ошиши эҳтимоли катта. Сабаби, Рэшфорд “Манчестер Юнайтед” бош мураббийи Рубен Аморимнинг режаларига кирмайди. Бундан ташқари, клубнинг янги футболчиси Матеус Кунья ҳужумчига тегишли бўлган 10-рақамни олган. Бу эса Рэшфорднинг ёзда жамоани тарк этишини янада муқаррар қилмоқда.
Эслатиб ўтамиз, Рэшфорд 2024 йилнинг иккинчи ярмида “Манчестер Юнайтед”дан “Астон Вилла”га ижарага берилган эди. У Унаи Эмери бошчилигидаги жамоада барча турнирлар доирасидаги 17 ўйинда майдонга тушиб, 9 та гол муаллифига айланган. Transfermarkt портали 27 ёшли футболчининг қийматини 50 миллион еврога баҳолаган.
Изоҳ (0)