Tez orada Germaniya maydonlarida Yevro—2024 musobaqasi start oladi. Turnirda ishtirok etadigan futbolchilar nomi allaqachon ma’lum. Bugun Yevropa Chempionatini o‘tkazib yuboradigan yulduz futbolchilarga to‘xtalib o‘tamiz.
Erling Holand va Martin Edegor — Norvegiya
Holandning 6 ta goli Ispaniya va Shotlandiya o‘rin olgan guruhda Norvegiyaga yordam bermadi. Norvegiyada Holand va Edegordan tashqari “Real”ga 4 ta gol urgan Aleksandr Syorlot hamda “Dortmund” himoyachisi Yulian Ryuerson bor.
Lyuka Ernandes va Kristofer Nkunku — Fransiya
Ernandes yana jarohat oldi. Futbolchi avvalgi jarohati tufayli JCH—2022 ni o‘tkazib yuborgan edi (ilk o‘yindayoq maydondan chiqib ketgan) va bu musobaqada umuman qaydnomadan ham joy olmadi.
Nkunku esa mavsumni stabil o‘tkazmagani va jarohatlarga moyilligi sababli qaydnomaga kiritilmadi.
Tibo Kurtua — Belgiya
Yevropa Chempionlar Ligasi finalida “Real” darvozasini qo‘riqlagan Tibo Kurtua terma jamoa bosh murabbiyi Domeniko Tedesko bilan sardorlik bog‘ichi sabab nizoga borgan edi. Qishda Tibo: “Meni hurmat qilishmayapti. Murabbiy nega aynan Lukaku sardor bo‘lganini 7 xil turini ko‘rsatib berdi. Menga turli bosimlar bo‘ldi”, degan edi.
Tedesko esa bu gaplarni rad etdi. Yakuniy qaydnomaga esa darvozabonni kiritmadi.
David Alaba — Avstriya
Qishda jarohat olgan futbolchi hali tuzalishga ulgurmadi. Murabbiylar shtabi Davidni delegatsiya safiga chaqirgan. Futbolchi Germaniyaga boradi, lekin maydonga tushmaydi. Ralf Rangnik uchun katta yo‘qotish.
Aleksander Isak va Deyan Kulusevski — Shvetsiya
Belgiya va Avstriya bilan bir guruhdan joy olgan terma jamoa saralashdan o‘ta olmadi. Isak — “Nyukasl” yetakchisi. Kulusevski esa “Tottenhem” yulduzi hisoblanadi. Shuningdek, Shvetsiya safida o‘ynaydigan “Sporting” superhujumchisi Viktor Dokeresh va “Manchester Yunayted” himoyachisi Viktor Lindeleflar ham turnirni o‘tkazib yuboradigan bo‘ldi.
Manuel Lokatelli, Franchesko Acherbi, Jorjo Skalvini va Sandro Tonali — Italiya
Yevropa chempioni Lokatelli Luchano Spallettining ishonchiga kira olmadi. Uning o‘rniga murabbiy 7 oylik diskvalifikatsiyadan qaytgan Nikolo Fajoliga ishonch bildirdi.
Jorjo Skalvini esa qaydnomadan joy olgan edi. Biroq “Atalanta”ning so‘nggi o‘yinida jarohat oldi. “Sassuolo” bilan birga A Seriyadan quyi divizionga tushib ketgan Domeniko Berardi va uzoq muddatga diskvalifikatsiya qilingan Sandro Tonali ham Italiyaga yordam bera olmaydi.
Stefan Savich — Chernogoriya
“Atletiko”ning eng muhim futbolchilaridan biri yana bir bor xalqaro turnirni o‘tkazib yuboradi.
Rafael Gerreyru — Portugaliya
Himoyachi jarohati sababli terma jamoa safiga chaqirilmadi. Shuningdek, Rafael YCHL yarim finalida “Real”ga qarshi o‘yinni ham o‘tkazib yuborishga majbur bo‘ldi. Gerreyru butun mavsumni ko‘ngildagidek o‘tkaza olmadi: ba’zida jarohat olgan bo‘lsa, ba’zan “Bavariya” asosiy tarkibidan joy ololmadi.
Mats Hummels, Leon Goretska va Serj Gnabri — Germaniya
“Ikkala futbolchi bilan ham uzoq suhbat qurdik. Ular xafa bo‘ldi, buni tushunish mumkin. Yevroda ishtirok etish uchun qo‘lidan kelgan barcha ishni qildi. Afsus, ular qaydnomadan joy olmadi”, — degandi bosh murabbiy Yulian Nagelsmann.
Shuningdek, murabbiy “Borussiya”dan Yulian Brandt hamda Karim Adeyemini chaqirmadi. Serj Gnabri esa jarohati sababli tarkibdan joy olmadi.
Edin Jeko va Mirolim Pyanich — Bosniya va Gersegovina
An’anaviy vaziyat: Bosniya o‘tish o‘yinigacha chiqdi va Ukrainaga mag‘lub bo‘ldi. Jeko “Fenerbahche”da o‘ynashda davom etadi, Pyanich esa BAAda javlon uradi.
Arkadiush Milik — Polsha
Hujumchi turnirga oz muddat qolganda jarohat oldi. Polsha o‘z yetakchilaridan birining xizmatidan foydalana olmaydi.
Isko, Gavi va Aleks Balde — Ispaniya
Uchala futbolchi ham jarohat olgan. Ayniqsa, 31 yoshli Iskoning jarohat olishi afsuslanarli: yarim himoyachi “Betis” safida ajoyib mavsumlaridan birini o‘tkazgan edi. Gavi esa anchadan buyon maydonga tushmayapti, Balde operatsiyadan so‘ng uzoq muddatga safdan chiqqan.
Markus Reshford, Ben Uayt, Harri Maguayr, Jeyms Meddison, Jek Grilish va Jeydon Sancho – Angliya
Reshford “Manchester Yunayted” tarkibida eng yomon mavsumini o‘tkazdi, uni tarkibga chaqirmaslik uchun mantiqli sabab bu. Uayt esa murabbiylar shtabi bilan til topisha olmasdan, o‘zi musobaqada ishtirok etishdan bosh tortdi. Shuningdek, “Chelsi” safida deyarli maydonga tushmagan Ris Jeyms va “Milan” himoyachisi Fikayo Tomorini ham qayd etib o‘tish lozim. Lekin hali jarohatidan to‘liq tuzalmagan Lyuk Shou termaga chaqirilgan.
Harri Maguayr, Jeyms Meddison va Jek Grilishlar yakuniy qaydnomadan so‘nggi lahzalarda chiqarib tashlangan. Maguayr — jarohati sababli. Meddison va Grilish o‘rniga esa Sautgeyt mavsumni yaxshiroq o‘tkazgan futbolchilar borishini ta’kidladi. Hujum chizig‘i shundoq ham kuchliligi bois, “Borussiya D” safida mavsumning yarmini ajoyib o‘tkazgan Jeydon Sancho tarkibdan tushirib qoldirildi.
Izoh (0)