Eron hukumati Xalqaro atom energiyasi agentligi (MAGATE) bilan “yangi formatda” hamkorlik olib boradi. Bu haqda mamlakat tashqi ishlar vaziri Abbos Araqchi ma’lum qildi.
Araqchining so‘zlariga ko‘ra, MAGATE bilan hamkorlik to‘xtamagan. Agentlikning Eronda tekshiruvlarni davom ettirish to‘g‘risidagi talablari Milliy xavfsizlik oliy kengashi tomonidan ko‘rib chiqiladi.
Agentlik bilan hamkorligimiz yangi shaklga kiradi, bu yangi voqeliklar va sodir bo‘lgan hodisalar nuqtayi nazaridan tabiiy holdir, dedi Araqchi elchilar va xorijiy diplomatik vakolatxonalar rahbarlari bilan uchrashuvda.
U Isroil va AQSH hujumlariga uchragan Eron yadroviy obyektlariga yaqinlashish “radioaktiv materiallar tarqalishi va portlashlarni o‘z ichiga olgan xavflarni keltirib chiqarishi”ni aytdi.
Inspektorlarning ushbu obyektlarga yaqinlashishi xavfsizlik borasida xavotir uyg‘otadi, dedi siyosatchi.
U Eron yadro dasturi bo‘yicha bo‘lajak muzokaralarga ham to‘xtaldi. Jumladan, uranni boyitishga yo‘l qo‘ymaydigan har qanday kelishuv qo‘llab-quvvatlanmaydi.
Bundan tashqari, muzokaralar mavzusi Eron raketa dasturi emas, aynan yadro dasturi bo‘lishi kerak, dedi diplomat.
2-iyul kuni Eron prezidenti Mas’ud Pezeshkiyon Tehron va MAGATE o‘rtasidagi hamkorlikni to‘xtatish to‘g‘risidagi qonunni imzoladi. Hujjat prezident tomonidan imzolangan paytdan boshlab qonunan kuchga kirgan va bajarilishi majburiy hisoblanadi.
Eronning yadroviy obyektlariga hujum
Isroil 13-iyundan boshlab Eronga tinimsiz hujum qilib, uning yadroviy obyektlari, mudofaa tizimlari, yuqori martabali harbiy amaldorlari va yadrochi olimlarini nishonga oldi. Hujumlar oqibatida kamida 627 kishi, jumladan, ko‘plab tinch aholi vakillari halok bo‘ldi, deb xabar berdi Eron Sog‘liqni saqlash vazirligi.
22-iyun kuni AQSH Isroilning harakatlariga qo‘shilib, uchta asosiy obyektga — Fordo, Natanz va Isfahonga aviazarbalar berdi. Hujumda bunker bombalardan ham foydalanildi. Markaziy razvedka boshqarmasi boshlig‘i Jon Retkliff operatsiya Eron yadroviy dasturiga jiddiy zarar yetkazganini ma’lum qildi. Zarbalardan ko‘p o‘tmay AQSH prezidenti Donald Tramp Eron va Isroil o‘rtasida o‘t ochishni to‘xtatish rejimi kuchga kirganini e’lon qildi, buni ikkala tomon ham tasdiqladi.
Izoh (0)