Badavlat rossiyaliklar farzandlari uchun xitoy tilida so‘zlashuvchi enagalarni tobora ko‘proq yollay boshladi. Bu haqda enagalik xizmatlarini ko‘rsatuvchi English Nanny kompaniyasi asoschisi Valentin Gogolga tayanib The New York Times xabar berdi.
Xitoy tilida so‘zlashuvchi enagalar Rossiya elitasi orasida talab bo‘yicha fransuz tilidagilardan o‘zib ketib, ingliz tilidagilardan keyin ikkinchi o‘rinni egallagan. Gogolning aytishicha, xitoylik enagalarga bo‘lgan talabni qondirish uchun kompaniya barcha imkoniyatlarni ishga solmoqda.
Ma’lum qilinishicha, bunday enagalarning oylik maoshi 5000 dollargacha yetadi. English Nanny mijozlari esa xitoy tilini ingliz tilidan keyin ikkinchi muhim xorijiy til sifatida tanlay boshlagan. The New York Times nashri bu holat Rossiyada davom etayotgan “xitoylashish” jarayonining faqat bir qismi ekanini yozmoqda.
Rossiyalik talabalar va maktab o‘quvchilari orasida ham xitoy tiliga qiziqish keskin oshgan. Xitoyda tahsil olish istagi, Xitoy madaniyati va mahsulotlariga bo‘lgan hurmat ham ortib bormoqda.
Yaqin vaqtgacha G‘arb madaniyati va qadriyatlariga sig‘ingan Rossiyada kutilmagan o‘zgarish yuz berdi — xitoylik bo‘lish, xitoy tilini bilish va bu madaniyatga yaqin bo‘lish moda va orzuga aylandi, deb yozadi NYT.
So‘nggi uch yil ichida Rossiyaning Ukrainaga qarshi urushi va Pekin bilan siyosiy yaqinlashuvi fonida Xitoyga bo‘lgan qiziqish keskin ortgan. Prezident Vladimir Putin ham nabirasi xitoy tilini bilishini ma’lum qilgan edi.
Men yaqinlarim va qarindoshlarim xitoy tilini o‘rganayotganini aytganimda nabiram borligini va u pekinlik tarbiyachisi bilan xitoy tilida bemalol suhbatlasha olishini tilga olgan edim, degan edi Rossiya rahbari.
Izoh (0)