Baydenning Si Szinpin bilan uchrashuvdagi nutqi paytida Blinkenning g‘alati harakatlari muhokamalarga sabab bo‘lmoqda

AQSH prezidenti Jo Bayden Xitoy rahbari Si Szinpin bilan uchrashdi. Ijtimoiy tarmoqlar foydalanuvchilari Amerika yetakchisining nutqi davomida davlat kotibi Entoni Blinkenning g‘alati xatti-harakatiga e’tibor qaratdi.

Diplomat prezidentning yoniga o‘tirib, uning har bir so‘zini xavotir bilan kuzatdi. 

“Blinken Baydenni lochin kabi kuzatib turibdi, u xato qilganida sakrashga tayyor”, — deb yozdi foydalanuvchilardan biri. 

“Agar Bayden belgilangan matndan uzoqlashsa, Blinken uni stol ostida turtib qo‘yish uchun tayyor turibdi”, — deya qo‘shimcha qildi boshqa foydalanuvchi. 

“Enaga Blinken har ehtimolga qarshi Baydenning yonida!” – hazil qildi uchinchi foydalanuvchi. 

Yana bir izohda esa AQSH davlat kotibining xatti-harakati Bayden yana biror nojo‘ya gap aytishidan qo‘rqayotgani bilan bog‘liqligi ta’kidlangan.

Avvalroq AQSH prezidenti Jo Bayden Xitoy yetakchisi bilan San-Fransiskoda o‘tkazilgan ikki tomonlama uchrashuvdan keyin Si Szinpinni oldingidek diktator deya hisoblashini ma’lum qilgandi.