Бадавлат россияликлар фарзандлари учун хитой тилида сўзлашувчи энагаларни тобора кўпроқ ёллай бошлади. Бу ҳақда энагалик хизматларини кўрсатувчи English Nanny компанияси асосчиси Валентин Гоголга таяниб The New York Times хабар берди.
Хитой тилида сўзлашувчи энагалар Россия элитаси орасида талаб бўйича француз тилидагилардан ўзиб кетиб, инглиз тилидагилардан кейин иккинчи ўринни эгаллаган. Гоголнинг айтишича, хитойлик энагаларга бўлган талабни қондириш учун компания барча имкониятларни ишга солмоқда.
Маълум қилинишича, бундай энагаларнинг ойлик маоши 5000 долларгача етади. English Nanny мижозлари эса хитой тилини инглиз тилидан кейин иккинчи муҳим хорижий тил сифатида танлай бошлаган. The New York Times нашри бу ҳолат Россияда давом этаётган “хитойлашиш” жараёнининг фақат бир қисми эканини ёзмоқда.
Россиялик талабалар ва мактаб ўқувчилари орасида ҳам хитой тилига қизиқиш кескин ошган. Хитойда таҳсил олиш истаги, Хитой маданияти ва маҳсулотларига бўлган ҳурмат ҳам ортиб бормоқда.
Яқин вақтгача Ғарб маданияти ва қадриятларига сиғинган Россияда кутилмаган ўзгариш юз берди — хитойлик бўлиш, хитой тилини билиш ва бу маданиятга яқин бўлиш мода ва орзуга айланди, деб ёзади NYT.
Сўнгги уч йил ичида Россиянинг Украинага қарши уруши ва Пекин билан сиёсий яқинлашуви фонида Хитойга бўлган қизиқиш кескин ортган. Президент Владимир Путин ҳам набираси хитой тилини билишини маълум қилган эди.
Мен яқинларим ва қариндошларим хитой тилини ўрганаётганини айтганимда набирам борлигини ва у пекинлик тарбиячиси билан хитой тилида бемалол суҳбатлаша олишини тилга олган эдим, деган эди Россия раҳбари.
Изоҳ (0)