Oddiy amerikalik oilaning senbernar kuchukchasini asrab olishi haqidagi “Bethoven” komediyasi 30 yil oldin ekranlarga chiqqan bo‘lsa-da, hanuzgacha bolalar bilan birga tomosha qilish mumkin bo‘lgan sevimli filmlar qatorida turadi.
Sara Rouz Karr
Nyutonlar uyiga yashirincha kirib kelgan kuchukchani birinchi bo‘lib oilaning eng kichik farzandi — 8 yoshli Sara Rouz Karr ijro etgan Emili ismli qizcha topib oladi. Yosh bo‘lishiga qaramay, u ancha tajribali aktrisa edi. Bungacha u uchta kichik rol o‘ynagandi, ularning eng ko‘zga ko‘ringani Arnold Shvarsenegger bosh rolni ijro etgan “Bolalar bog‘chasi politsiyachisi” filmidagi Emma roli edi.
“Bethoven ” filmi muvaffaqiyatidan so‘ng Sara Rouz Karr yana uchta loyihada suratga tushdi, ularning eng yirigi “Bethoven 2” edi. 2003-yilda u Floridadagi xususiy san’at kollejiga o‘qishga kirdi va shundan so‘ng aktyorlik kasbiga qaytmadi.
Kristofer Kastil
Nyutonlarning o‘rtancha farzandi Ted rolini Kristofer Kastil ijro etgan. Uning qahramoni — o‘quvchilar tomonidan xo‘rlanadigan tortinchoq, nimjon yigitcha. Bethoven tufayli u bu muammoni yengib o‘tadi va filmning hal qiluvchi lahzasida jasurlik va qat’iyatlilikni namoyon etadi.
“Bethoven” filmida suratga tushishdan oldin Kastil bir nechta seriallarda qatnashgan. Ularning eng ahamiyatlisi — turmush qurgan yolg‘iz ota-onalar Frenk va Kerol (Patrik Daffi va Syuzann Somers) hamda ularning avvalgi nikohlaridan bo‘lgan olti farzandi haqidagi “Qadam-baqadam” sitkomidir. Serial 1991-yildan 1998-yilgacha efirga uzatilgan va Kristofer Kastilning deyarli butun ijodiy faoliyatini qamrab olgan. “Qadam-baqadam” serialidagi Mark Foster roli uchun u to‘rt marta yosh aktyor mukofotiga nomzod bo‘lgan. Yana ikkita nomzodlikni “Bethoven” va “Bethoven 2” uchun qo‘lga kiritgan. Keyinchalik Kastil aktyorlik faoliyatini yakunlab, iqtisodiyot o‘qituvchisi bo‘lib ishlagan.
Nikol Tom
Nyutonlarning katta qizi Rays (uni Nikol Tom o‘ynaydi) maktabdagi Mark ismli chiroyli yigitni sevib qoladi, ammo u bilan gaplashishga botina olmaydi. Aqlli Bethoven uyatchan egasiga orzu qilgan tanishuvini amalga oshirishda yordam beradi.
“Bethoven” Nikol Tomning ilk yirik roli bo‘ldi. U bundan oldin ikki serialda epizodik rollarda suratga tushgandi. Film muvaffaqiyat qozonganidan so‘ng, yosh aktrisa prodyuserlarning e’tiborini tortdi. U mashhur “Beverli-Xillz 90210” serialining bir necha qismlarida ishtirok etdi, “Vahima” trillerida rol ijro etdi, superqahramonlar multseriallarida Superqizga ovoz berdi. Uning eng asosiy ishi “Enaga” seriali bo‘ldi. Bunda Tom olti mavsumning barchasida asosiy qahramonlardan biri — Meggi Sheffild rolini ijro etdi.
Charlz Grodin
Oila boshlig‘i Jorj Nyuton rolini aktyor Charlz Grodin ijro etgan. Uning qahramoni it yoqmaydigan yagona odamdir. Jorj juda saranjom-sarishta, tartibni yoqtiruvchi odam, ammo aynan unga Bethoven ning ko‘plab sho‘xliklarining oqibatlarini bartaraf etish to‘g‘ri keladi. Janob Nyutonning itni uxlatishga osonlikcha rozi bo‘lishi taajjublanarli emas, faqat oilasiga bo‘lgan muhabbati uni itni olib kelish uchun hayvonlar uyiga qaytishga majbur qiladi.
Suratga olish paytida Charlz Grodin 56 yoshda bo‘lib, u 30 yillik aktyorlik tajribasiga ega edi. Shunday bo‘lsa-da, “Bethoven” va “Bethoven 2” filmlari uni yanada mashhur qildi. Keyinchalik u Ron Andervudning “Qalb va ruhlar” nomli melodramasida rol ijro etdi va “Saturn” mukofotiga nomzod bo‘ldi.
90-yillarning ikkinchi yarmida aktyor o‘z karyerasida tanaffus qildi va faqat 2006-yilda “Sobiq oshiq” romantik komediyasida bosh qahramon Sofi (Amanda Pit)ning otasi rolida ekranlarga qaytdi. Faoliyatining so‘nggi yillarida Charlz Grodin tok-shouda boshlovchilik qilgan va memuar asar yozgan. Aktyor 2021-yilda 86 yoshida suyak iligi saratonidan vafot etdi.
Bonni Xant
“Bethoven” filmidagi eng katta gonorarni Nyutonlarning onasi rolini ijro etgan aktrisa Bonni Xant olgan. Uning qahramoni Elis kattalar orasida birinchi bo‘lib bolalarning itni qoldirish iltimoslariga ko‘nadi, so‘ngra filmning ko‘p qismida itni haydab yuborishga tayyor turgan erini tiyib turadi.
Xant aktrisa bo‘lish qaroriga birdan kelmagan. U bir muddat hamshira bo‘lib ishlagan, stendapda o‘zini sinab ko‘rgan va 30 yoshga yaqinlashgandagina katta kinoda o‘zini sinashga qaror qilgan. Uning keng ekrandagi ilk paydo bo‘lishi Dastin Xoffman va Tom Kruz bilan “Yomg‘ir odami” filmidagi ofitsiant roli edi. Keyingisi esa “Bethoven” bo‘ldi.
1995-yilda u “Jumanji” filmida asosiy rollardan birini ijro etdi. U “Oskar” mukofotiga sazovor bo‘lgan “Jerri Maguayr” dramasida, mashhur “Yashil mil” filmida qatnashdi, shuningdek, Shon Levining “Katta oila” komediyasida oila onasi Keyt Beyker rolini o‘ynadi. Bundan tashqari, Bonni Xant o‘zining “Bonni bilan” nomli shousini yaratdi, bu shou ko‘plab nufuzli mukofotlarga nomzod bo‘ldi.
Izoh (0)