Rossiya harbiylari “Hamkorlik-2025” o‘quv mashg‘ulotlarida ishtirok etish uchun O‘zbekistonga keldi. Bu haqda Rossiya Mudofaa vazirligi xabar berdi.
O‘quv mashg‘ulotlari 15—21-iyul kunlari “Termiz” poligonida bo‘lib o‘tadi. Bo‘linmalar harbiy va maxsus texnika kolonnalari tarkibida poligonga marsh uyushtirgan. Ular Tojikiston va O‘zbekiston tog‘lari bo‘ylab 300 kilometrdan ortiq masofani bosib o‘tgan.
Shaxsiy tarkib BTR-82A zirhli transportyorlar, “Ural” avtomobillari va “KamAZ” bazasidagi maxsus texnikalar yordamida baland tog‘li yo‘llardagi ko‘tarilish va tushish yo‘llarini muvaffaqiyatli bosib o‘tgan, deydi Rossiya Mudofaa vazirligi.
Harbiy bo‘linmalar quyidagi jangovar harakatlarni mashq qiladi:
- chegara hududlariga noqonuniy qurolli tuzilmalar (NQT) kirib kelgan taqdirda ularni aniqlash va yo‘q qilish hamda bo‘linmalarni boshqarish;
- NQT guruhlari chegara yaqinidagi inshootlar va pozitsiyalarni egallagan holatda ularni yo‘q qilish bo‘yicha qo‘mondonlikni boshqarish;
- bo‘linmalarining dushman egallab olgan inshootlar va pozitsiyalarni qayta egallashi;
- dushmanning kichik guruhlariga qarshi kurash olib borish;
- shuningdek, jangarilar tomonidan bosib olingan aholi punktini shturm qilish va tozalash amaliyotini tashkil etish.
Rossiya harbiy kontingentining asosiy qismini Markaziy harbiy okrugning 201-harbiy bazasi bo‘linmalari tashkil etadi. Ular tarkibiga tog‘ va shturm bo‘linmalari, radioelektron kurash bo‘yicha mobil guruhlar, razvedka va FPV dronlari bilan ishlaydigan guruhlar, Mi-24 zarba beruvchi vertolyotlari ekipajlari kiradi.
Tojikistonda joylashgan 201-harbiy baza Rossiyaning o‘z hududidan tashqaridagi eng yirik harbiy obyekti hisoblanadi. U Dushanbe va Boxtar shaharlari hududida joylashgan. Uning tarkibiga motoo‘qchi, tank, artilleriya, razvedka bo‘linmalari, havo hujumidan mudofaa, radiatsion, kimyoviy va biologik himoya hamda aloqa bo‘linmalari kiradi.
Ma’lumot o‘rnida, O‘zbekiston va Rossiya mudofaa vazirlari may oyida 2026—2030-yillarga mo‘ljallangan harbiy hamkorlik rejasini imzolagan edi.
Izoh (0)