Isroil hukumati Eron bilan keskinlik ortgani sababli fuqarolariga mamlakatdan chiqishni taqiqladi. Bu haqda Middle East Monitor xabar berdi.
Ma’lum qilinishicha, hukumat ichki aviakompaniyalarga isroillik yo‘lovchilarni xalqaro reyslarga qo‘ymaslikni buyurgan. Bunga Eronning Isroil aeroportlariga ehtimoliy hujumi xavfi sabab bo‘lmoqda. Isroilning asosiy xalqaro darvozasi bo‘lgan Ben-Gurion aeroporti “keyingi ogohlantirishgacha” yopilgan.
Qaror xavfsizlik idoralari rahbarlarining aeroportlarda odamlar to‘planib qolishi va Eron javob zarbasi bergan taqdirda ko‘plab qurbonlar bo‘lishi mumkinligi haqidagi tashvishlaridan kelib chiqqan. Isroil transport vaziri Miri Regev bu borada quyidagicha bayonot bergan:
Hozirgi bosqichda biz isroilliklarning xorijga chiqishiga ruxsat bermaymiz. Chet elga ketayotganlar — bu mamlakatga tashrif buyurgan odamlar: diplomatlar, sayyohlar va boshqalar, degan vazir.
U hozirda xorijda qolib ketgan 100 mingdan ortiq Isroil fuqarolarini qaytarish bo‘yicha operatsiya tayyorlanayotganini ta’kidlagan. Regev mazkur jarayon “bosqichma-bosqich va rejali ravishda” o‘tkazilishiga va’da bergan.
Biroq bu siyosiy noroziliklarni keltirib chiqargan. Isroil Milliy birdamlik partiyasi rahbari va Harbiy vazirlar mahkamasi a’zosi Benni Gans vazirning so‘zlarini qoralagan.
Operatsiya kutayotgan keksa ayol; farzandini Isroilda yolg‘iz qoldirgan yosh beva — bular uyga qaytishi kerak bo‘lgan minglab kishilardan atigi ikkitasi. Sizning vazifangiz, vazir, hukm chiqarish emas, balki ularning xavfsiz qaytishini ta’minlashdir, degan u.
Sayohat cheklovlari Isroilning Eronning Mashhad aeroportiga misli ko‘rilmagan hujumi ortidan kiritildi. Eron hali ham mazkur hujumga javob qaytarmagan bo‘lsa-da, aeroportlar endilikda hujum nishoniga aylanishi mumkinligidan xavotir kuchaygan.
Izoh (0)