Braziliyalik hujumchi Neymar faoliyatini Turkiya chempionatida davom ettirishi mumkin. Fanatik nashri xabariga ko‘ra, “Fenerbahche” 33 yoshli futbolchiga bir yillik shartnoma taklif qilgan, shuningdek, unda bitimni yana bir yilga uzaytirish imkoniyati ham ko‘zda tutilgan.
Ma’lumotlarga ko‘ra, Neymarning “Santos” bilan tuzilgan shartnomasida futbolchiga Yevropa klublariga bepul o‘tish huquqini beruvchi band mavjud. Istanbul klubi aynan shundan foydalanib, uni jamoaga taklif qilmoqchi.
Ingliz jurnalisti Kris Antonining xabar berishicha, Neymarga nafaqat “Fenerbahche”, balki Yevropaning boshqa klublari — Angliyaning “Aston Villa” hamda Fransiyaning “Marsel” klubi ham qiziqish bildirmoqda. “Santos” esa uni tarkibda saqlab qolish maqsadida yangi shartnoma taklif qilgan.
Neymar 2025-yilning yanvar oyida Saudiya Arabistonining “Al-Hilol” klubidan erkin agent maqomida “Santos”ga o‘tgan edi. U joriy mavsum barcha musobaqalar doirasidagi 14 ta o‘yinda maydonga tushdi, o‘z hisobiga 3 ta gol va 3 ta golli uzatma yozdirib qo‘ygan. Uning “Santos” bilan shartnomasi joriy yilning iyun oyining oxirigacha amal qiladi. Transfermarkt portali hujumchining qiymatini 12 million yevroga baholagan.
Eslatib o‘tamiz, avvalroq OAVda Neymarga Istanbulning boshqa klubi — “Galatasaroy” ham qiziqish bildirgani haqida xabarlar tarqalgan edi. Shuningdek, futbolchining agenti uni Myunxenning “Bavariya” klubiga taklif qilgani borasida mish-mishlar tarqalgandi.
Izoh (0)