Neymarning otasi futbolchining rejalari haqida ma’lum qildi

"Santos" hujumchisi Neymarning otasi — Neymar da Silva o‘g‘lining Braziliya klubida uzoq muddat qolishni rejalashtirayotganini ma’lum qildi.

Bizning loyiha faqat besh oyga mo‘ljallanmagan. Shartnomani uzaytirish variantini ham ko‘rib chiqmoqdamiz.

Biz bu yerga faqat besh oy o‘ynab ketish uchun kelmadik. “Santos”ga qayta tuzish, klubga hamkorlar topish va rivojlanish imkoniyatini berish uchun keldik, dedi Neymarning otasi TNT Brasil nashriga bergan intervyusida.

Neymar professional futbolchilik faoliyati davomida “Santos”, “Barselona”, “PSJ” va “Al-Hilol” klublarida o‘ynagan. Braziliya milliy terma jamoasi safida 33 yoshli vinger 128 ta o‘yinda maydonga tushib, 79 ta gol urgan.

Kecha, 17-fevral kuni futbolchi “Santos” klubida ilk golini urdi va jamoasining g‘alabasida hissa qo‘shdi.

Transfermarkt portali ma’lumotlariga ko‘ra, Neymar hozirda 15 million yevro qiymatga ega.

Avvalrqo Neymarning o‘zi “Barselona”ga qaytish imkoniyatini o‘ylab ko‘rayotgani haqida xabar berilgandi.