71 yoshli Sun Minxuey Uxandagi National Fitness Newcomers Quality Competition 2025 fitnes modellari musobaqasida aralash toifada bronza medalini qo‘lga kiritdi. U, shuningdek, tanlovning eng keksa ishtirokchisi bo‘ldi, deb South China Morning Post xabar bermoqda.
Minxuey nafaqaga chiqqanidan so‘ng, 67 yoshida sport bilan shug‘ullana boshlagan. Shu vaqt mobaynida u velosiped haydash, arqonda sakrash, yugurish va sayr qilish kabi turli sport turlarini sinab ko‘rdi.
“Bir oydan sal ko‘proq mashg‘ulotlardan keyin o‘zgarishlarni seza boshladim. Yoshim oshgani sayin mushaklarimni yo‘qotmadim, aksincha, ularni ko‘paytirdim. Bu menga katta ishonch bag‘ishladi”, dedi ayol.
Hozirgi kunda uning jadvalida haftasiga kamida beshta mashg‘ulot mavjud. Ayol, shuningdek, muvozanatli ovqatlanishga eʼtibor qaratmoqda.
60 yoshida Minxuey Xitoyning eng sharqiy nuqtasidan eng janubiy shahri Sanyagacha velosipedda 45 kun ichida 6 ming kilometrdan ortiq masofani bosib o‘tdi. Shu tariqa u jamoadoshlari bilan birga Ginnesning rekordlar kitobiga kirdi.
“Yosh — bu shunchaki raqam, cheklov emas. Baʼzilar keksalar faqat choy ichib, sayr qilishi kerak deb o‘ylashadi, men esa boshqacha hayot tarzini xohlayman”, dedi ayol.
Izoh (0)