Angliyaning “Chelsi” klubi hujumchi Mixaylo Mudrik ustidan sudga murojaat qilishi mumkin. Bu haqda The Athletic nashri xabar berdi.
Agar Mudrikning doping qoidalarini buzganligi to‘liq isbotlansa, klub unga qarshi mehnat shartnomasini buzganlik uchun da’vo qo‘zg‘atmoqchi. “Chelsi” futbolchini “Shaxtyor”dan 100 million yevroga sotib olgan edi (70+30 bonus). Agar ukrain futbolchisining aybi isbotlansa, bu sarmoya katta xavf ostida qolishi mumkin. Mudrik esa to‘rt yilgacha futboldan chetlashtirilishi mumkin.
Boshqa bir nashr esa klubning sudga murojaat qilishi ehtimoldan yiroq ekanligini ma’lum qilgan. Chunki bu holat “Chelsi” imijiga salbiy ta’sir ko‘rsatishi va boshqa futbolchilarni jalb qilishda qiyinchilik tug‘dirishi mumkin.
Avvalroq Angliya Futbol Assotsiatsiyasi (FA) Mudrikni antidoping qoidalarini buzishda aybli deb topgan edi. Biroq bu hali to‘liq isbotlanmagan.
Eslatib o‘tamiz, 24 yoshli Mixaylo doping testida musbat natija qayd etilgani uchun vaqtincha futboldan chetlashtirilgandi. U noyabr oyida milliy jamoada o‘ynaganidan so‘ng test topshirgan va shundan beri maydonga chiqmayapti.
Izoh (0)