“Chelsi” Mudrik transferi borasida kelishuvga erishdi. London klubi bonuslar bilan 110 mln yevro to‘laydi

“Chelsi” klubi “Shaxtyor” bilan hujumchi Mixaylo Mudrikning transferi borasida kelishib oldi.

The Athletic xabariga ko‘ra, londonliklar 22 yoshli futbolchi transferi uchun 70 million yevro to‘laydi, shuningdek, 40 million yevro bonus pullari nazarda tutilgan. Klub ukrainalik futbolchi bilan 7 yillik shartnoma imzolaydi.

Futbolchining yillik maoshi 7,5 million yevroni tashkil qiladi, deya xabar qilmoqda Nikolo Skira.

Mudrik uchun asosiy da’vogar “Arsenal” bo‘lib turgandi. Avvalroq “kanonirlar” Mixaylo uchun 90—95 million yevro taklif qilgani xabar qilingandi.

Biroq “Chelsi” so‘nggi lahzada futbolchini o‘z tomoniga og‘dirishga erishgan. Qayd etilishicha, “Chelsi” maosh borasida hamshaharidan ikki barobar ko‘p pul taklif qilgan. Mudrik o‘zi avvaliga “Arsenal” variantini ma’qul ko‘rgan, biroq “Chelsi”ning operativ ishlashi uning o‘z fikridan qaytishiga sabab bo‘lgan.

Futbolchi Ukraina Premyer Ligasi joriy mavsumida 12 ta o‘yin o‘tkazib, 7 ta gol va 7 ta golli uzatma muallifiga aylandi. Shuningdek, u Chempionlar Ligasidagi 6 o‘yinda 3 ta gol va 2 ta assist amalga oshirgan.