Bollivud deyilganida ko‘z oldimizga darrov rang-barang film kadrlari, ajoyib qo‘shiqlar, sevgiga boy hikoyalar keladi. Ammo bu kino dunyosidagi yorqin aktrisalar ortida ko‘plab murakkab qarorlar, ziddiyatli munosabatlar va mojarolar yashirin. Ayrim hollarda aktrisalarni hatto iste’dod va chiroy ham muvaffaqiyatga olib chiqmaydi, aksincha, ularning yo‘lini to‘sib qo‘yadi.
Nima uchun ba’zi rejissyorlar salohiyati baland bo‘lsa ham, ayrim aktrisalar bilan ishlashni istamaydi? Quyida shu haqda so‘z boradi.
1. Kangana Ranavut — bahslardan cho‘chimaydigan “qirolicha”
Kangana kuchli xarakterli, fikrini ochiq aytadigan, haqiqatni yashirmaydigan, qo‘rqmas ayollardan. “Qirolicha”, “Tanu va Manu to‘yi” va “Manikarnika” filmlaridagi rollari orqali tanilgan aktrisa o‘zining keskin va ochiq tanqidlari bilan ham mashhur. Ranavut ko‘p hollarda turli tortishuv va janjallar markazida yurishi esa rejissyorlarni qo‘rqitadi.
Bollivudda esa tanish-bilishchilik va nepotizm ko‘p narsani hal qiladi. Kangana esa bu tizimga doim qarshi chiqadi. U gender tengsizlikni doim qoralaydi va kino sanoatidagi kamchiliklarni ochiq aytadi. Shu bois, ko‘pchilik rejissyorlar u bilan ishlashni murakkab deb hisoblaydi.
2. Priyanka Chopra — Gollivudga yon bosadigan, o‘ta mustaqil aktrisa
Priyanka bir paytlar hind kinosining eng porloq yulduzlaridan edi. Keyin esa Gollivudda ham o‘zini sinab ko‘rdi va u yerda ham o‘z o‘rniga ega bo‘ldi. Chopra “Kvantiko” serialida rol o‘ynadi, blokbasterlarda suratga tushdi, mashhur xonanda Nik Jonas bilan turmush qurdi. Bularning barchasi uni xalqaro darajada tanitdi.
Ammo aynan shu muvaffaqiyat ham uni Bollivuddan uzoqlashtirib qo‘ydi. Ba’zi hind rejissyorlari uni endi “yetishib bo‘lmaydigan aktrisa” deb hisoblashadi, chunki Priyanka Chopra talab qiladigan gonorar narxi baland, vaqti yo‘q, buning ustiga, uning qarashlari o‘ta g‘arbona bo‘lib qolgan, degan fikrlar bor.
3. Dipika Padukone — soya solayotgan o‘tmish va depressiya
Dipika Padukone haqiqiy aktrisalik mahoratini ko‘rsatgan san’atkor. U “Om Shanti Om”, “Bajirao Mastani” va “Padmavat” filmlarida muvaffaqiyatli obrazlar yaratgan. Ammo bunga qadar aktrisa ko‘plab qiyinchiliklardan o‘tgan.
U ochiqchasiga ruhiy tushkunlik bilan kurashgani haqida gapirgan, bu esa katta jasorat talab qiladi. Shu sababli ayrim rejissyorlar uning ruhiy holati filmga salbiy ta’sir qilishi mumkin, deb hisoblashadi. Bundan tashqari, Ranvir Singx bilan bo‘lgan munosabatlari doimo ommaviy axborot vositalarining diqqat markazida. Bu ham yangi filmlar reytingiga putur yetkazadi.
4. Anushka Sharma — mustaqil va o‘z yo‘lini tanlagan ijodkor
Anushka nafaqat mohir aktrisa, balki muvaffaqiyatli prodyuser ham. U Clean Slate Filmz nomli prodyuserlik kompaniyasiga asos solib, bir qancha noodatiy g‘oyaga boy filmlarni suratga olgan. Aktrisaning mana shu mustaqilligi va tadbirkorligi ayrim rejissyorlarni cho‘chitadi. Ular Anushka film jarayoniga haddan tashqari aralashib, o‘z shartlarini qo‘yadi deb o‘ylashadi.
Aslida muammo nimada?
Bollivudda muayyan iyerarxiya mavjud: ko‘pchilik rejissyorlar yirik kompaniyalar va prodyuserlarga qaram. Ular hech qanday xavf-xatar yuzaga kelishini istamaydi va sinovdan o‘tgan, itoatkor aktyorlar bilan ishlashni ma’qul biladi. Ayniqsa, mustaqil fikrli ayollar ularga tahdid sifatida ko‘rinadi.
Izoh (0)