Iste’dodli aktrisa va xonanda Aliya Bhatt karyerasi shiddat bilan rivojlanib borayotgan aktrisalardan biridir. U allaqachon millionlab muxlislar tomonidan e’tirof etilgan va Bollivudning boshqa yulduzlarining olqishlariga sazovor bo‘lgan.
Aktrisaning bolaligi va kinoga ilk qadam
Bo‘lajak Bollivud aktrisasi 1993-yil 15-mart Mumbayda Mahesh Bhatt va Soni Razdanning oilasida dunyoga kelgan. Aliya o‘smirlik yillarini Arab dengizi sohilidagi shaharda o‘tkazdi. Bolaligida to‘ladan kelgani uchun uni yaqinlari Alu (kartoshka) deb chaqirishgan. Qizning kelajagi hayotining ilk kunlaridanoq oldindan belgilab qo‘yilgan edi, chunki u kino olami bilan yaqindan faoliyat yuritadigan oilada tug‘ilish baxtiga muyassar bo‘lgandi.
Bhatt ota-onasining har ikkisi ham kino sanoatining mashhur vakillaridan bo‘lgan. Aliya va uning singlisi Shahin ijodiy muhitda ulg‘aygan. Ularning otasi Mahesh Bhatt rejissyor, prodyuser va ssenariy muallifidir. Uning mehnati ortida ellikdan ortiq filmlar mavjud. Mahesh Bhatt hatto Hindistondagi eng nufuzli Milliy kino mukofotiga ham sazovor bo‘lgan.
Aliyaning onasi Soni Razdan aktrisa bo‘lgan. Uning Shahin ismli singlisidan tashqari o‘gay akasi Rahul va singlisi Puja ham bor. Ular Mahesh Bhattning Loren Brayt bilan birinchi nikohida tug‘ilgan. Rejissyor aktrisa Soni Razdanni sevib qolganidan so‘ng Islom dinini qabul qilgan va shu tariqa birinchi nikohidan ajralmay, yana bir marta uylangan.
Jajji Aliya 6 yoshligida “Jinoiy roman” filmida debyut qildi, unda bosh qahramonlar sifatida taniqli aktyorlardan Akshay Kumar va Priti Zinta ishtirok etdi. Aliya Priti Zintaning singlisi sifatida ko‘rinish bergan.
Aliya Bombey shahridagi Jamnabai Narsi maktabini tamomlagandan so‘ng, qaysi kasbni tanlash haqida uzoq o‘ylab o‘tirmadi: uning taqdiri kino bilan bog‘liq edi.
Aliya Bhatt ishtirokidagi filmlar
2012-yilda “Yil talabasi” filmining premyerasi bo‘lib o‘tdi. Film uchun aktrisa 16 kilogramm vazn tashlashiga to‘g‘ri keldi. Avvaliga u bosh rol uchun o‘zini juda ham yosh deb hisoblagani sababli kastingdan o‘tishiga shubha bilan qaragan. Boz ustiga, Aliya suratga olish jarayonlari sabab 12-sinfni tugata olmagan.
Uning ijrosi turli muhokamalarga sabab bo‘lgan. Ba’zi tanqidchilar uni Karina Kapurning debyuti bilan solishtirgan. Ammo aynan shu loyiha orqali rejissyor Karan Johar va bosh rollarni ijro etgan aktyorlar Hindistonda tanila boshladi. Do‘stlik va sevgi haqidagi komediyali melodrama xitga aylanib, kino kassalarida 12 million dollar ishlab topdi, bu ko‘rsatkich o‘sha vaqtdagi hind kinosi katta yutuq edi.
Oradan ikki yil o‘tgach, Aliya Bhattning filmografiyasiga Imtiaz Alining “Shosse” filmi qo‘shildi. Loyiha 64-Berlin kinofestivalida taqdim etildi. Qizig‘i shundaki, ssenariy suratga olish boshlanishidan oldin tugallanmagan edi. Rejissyor hikoyaga improvizatsiya muhitini bergan va film yakuni syomka jarayonida o‘ylab topilgan. Aliyaning ushbu filmdagi ijrosi ikkita mukofot: “Stardust” va “Filmfare”ga sazovor bo‘ldi.
Chetan Bhagatning romani asosida ishlangan “Ikki shtat” melodramasidagi roli uchun aktrisa tamil tilini o‘rganishi kerak bo‘lgan. Aliya Bhatt taniqli hamkasbi Arjun Kapur bilan birga ishlagan. Tanqidchilar aktrisaning navbatdagi ijrosini ham yuqori baholadilar.
“Hampti Sharmaning kelini” nomli romantik komediyasi muvaffaqiyati bo‘yicha o‘zidan avvalgi ikkita loyihadan o‘zib ketdi. Unda Aliya to‘yiga bir hafta qolganda notanish yigitni sevib qolgan panjoblik Kavya ismli qiz rolini ijro etgan. Mazkur rol unga “Eng yaxshi ayol roli” nominatsiyasida Stardust mukofotini olib kelgan. Shuningdek, film katta kassa tushumlariga ham ega bo‘lgan.
2014-yil oxirida Bhatt Shahid Kapur bilan birga “Tunlari uyqusiz” melodramasida suratga tushdi. Film prokatda muvaffaqiyatsizlikka uchradi. Tanqidchilarning fikriga ko‘ra, kinodagi qahramonlar o‘rtasidagi tuyg‘ular ishonarli ko‘rinmagan.
Ammo “Uchayotgan Panjob” trilleri hind kinosi tarixida xitga aylandi. Shunga qaramay, Aliya Bhattning muvaffaqiyat unga qimmatga tushdi: aktrisa film byudjeti taqchilligi tufayli juda kichik gonorar olishga rozi bo‘lgan edi. Loyiha unga ajoyib ijrosi uchun “Filmfare” va “Zee Cine Winners” marosimidagi eng mukofotini taqdim etdi.
2018-yilda Bhatt 2008-yilda suratga olingan “Josus ayol” trillerining remeykida suratga tushish orqali muxlislari quvontirdi. Film real voqealarga asoslangan bo‘lib, ma’lumot beruvchi agent bo‘lish uchun pokistonlik amaldorga turmushga chiqqan josus ayol hikoyasiga asoslangan. Blokbaster aktrisaga yana bir karra “Filmfare” mukofotini olib keldi va mashhurlikning yangi cho‘qqilariga olib chiqdi. Loyihaning kassa tushumlari esa aktrisa ilgari ishtirok etgan barcha filmlarni ortda qoldirdi.
Shuningdek, Aliya o‘zining ko‘pqirrali san’atkor ekanini isbotlash maqsadida filmlarda saundtreklarni ham ijro eta boshladi. Aliyaning “Sooha Saaha” qo‘shig‘i bunga yaqqol dalildir. Hozirda Aliya Bhatt eng katta maosh oladigan Bollivud yulduzlaridan. Uning gonorari 720 ming dollardan 960 ming dollargacha yetadi.
2019-yilda aktris Abxishek Varmanning “Payg‘ambar” romantik melodramasida ishtirok etdi, ushbu film Bollivud yulduzlaridan Madhuri Dikshit, Sonakshi Sinxa va Varun Dxavanni suratga olish maydonchasida birlashtirdi.
2022-yil qishda bo‘lib o‘tgan 72-Berlin kinofestivalida aktrisa bosh ijrosidagi “Gangubay Katavadi” biografik filmi namoyish etildi. Unda kino sohasida ishlashni orzu qilgan bosh qahramon butunlay boshqa dunyoga tushib qoladi va o‘z tanasini sotishga majbur bo‘ladi. Shu orqali u kinoda ma’lum bir maqomga erishadi, ammo oxir-oqibat yo‘ldan adashgan ayol bu ishlarini tashlaydi va unga o‘xshab aldanganlarga va yetimlarga yordam berishga qaror qiladi.
Shaxsiy hayot
Aktrisa o‘zining qisqa bo‘yi va doim yosh ko‘rinishi bilan ajralib turadi. 160 sm balandlikka ega Aliya Bhattning vazni 54 kilogrammdan oshmaydi. Buning uchun u yoga va kardio mashqlarini bajarishga odatlangan.
Aliya mashinani haydashni yaxshi ko‘radi va uning eng sevimli dam olish shakli — uzoq vaqt uxlash. Aktrisa 12 soat davomida to‘xtovsiz uxlashi mumkin.
2017-yilda Aliya Bhatt Bollivudning yorqin yulduzi Ranbir Kapur bilan ishqiy munosabatlari haqida xabarlar tarqala boshladi. Juftlik 2018-yilda unashtirilgan edi, ammo oradan bir yil o‘tgach, Bhatt va Kapurning rishtalariga putur yetdi. Ranbir va uning onasi Aliyaning kino karyerasidan voz kechib, uy Bekasi bo‘lishini istaydi, ammo aktrisa bunday qila olmaydi.
2021-yilda ularning to‘yi haqidagi yangi xabarlar aktrisaning muxlislarini quvontirdi. Uzoq kutilgan to‘y 2022-yilning bahorida bo‘lib o‘tdi. Tez orada yulduz homiladorligini e’lon qildi va noyabr oyida Raxi ismli qiz farzandli bo‘ldi.
Bugungi kunda Aliya Bhatt
Aktrisaning kundalik tartibi va ish jadvali bir yil avval belgilab qo‘yilgan. Hozirda Bhattga rejissyorlar tomonidan muntazam ravishda yangi loyihalar taklifi kelib tushmoqda. Uning karyerasi esa jadal rivojlanib bormoqda.
2023-yilda Aliya o‘zining kino sanoatiga kirib kelishi munosabati bilan 10 yillik yubileyini nishonladi. Uning karyera va oilasiga bag‘ishlangan intervyusi Femina nashrida chop etildi. Filmlardagi qiziqarli rollardan tashqari, Bhatt boshqa sohalarda ham yutuqlarga erishgan: u Gucci brendining ambassadori hisoblanadi.
Shuningdek, afsonaviy Met Gala qizil gilamiga ham taklif etilgan kamyob mashhurlardan hisoblanadi. Aliya moda sohasida ham faol bo‘lib, o‘zining “Ed-a-Mamma” nomli kiyim brendiga ega. Ushbu brend ekologik toza kiyim ishlab chiqarishga ixtisoslashgan
Izoh (0)