Studio Ghibli multfilmlarining uslubi asosan buyuk yapon animatori Hayao Miyazakining animelari bilan belgilangan bo‘lsa-da, boshqa rejissyorlar tomonidan suratga olingan ko‘plab ajoyib asarlarga ham ega. Ushbu maqolada aynan ana shunday filmlar haqida so‘z yuritamiz.
“Yerdengizi afsonalari”
- Fantastika, sarguzasht.
- Yaponiya, 2006-yil.
- Davomiyligi: 1 soat 55 daqiqa.
- IMDb: 6,3.
Sehrli va mo‘jizaviy dunyodagi Yerdengizda tashvishli kunlar boshlanmoqda. Insonlar ham xavf ostida: ular qurg‘oqchilik, g‘alati kasalliklar va ajdarho hujumlariga duch kelmoqda. Yosh shahzoda Arren uyidan qochib, bu ofatlarning sababini tushunishga urinayotgan buyuk sehrgarga duch keladi. Ular birgalikda javoblar izlaydi va zulmat bilan kurashishadi — nafaqat tashqi, balki har bir insonda mavjud bo‘lgan ichki zulmat bilan ham. Mazkur multfilm buyuk animator Hayao Miyazakining o‘g‘li Goro Miyazaki tomonidan yaratilgan.
“Kecha edi”
- Drama, melodrama.
- Yaponiya, 1991-yil.
- Davomiyligi: 1 soat 59 daqiqa.
- IMDb: 7,6.
Studio Ghibli hammuassisi va Miyazakining doimiy hamkori Isao Takahata ushbu kutilmagan jiddiy dramada kundalik mavzularda fikr yuritadi: ilk muhabbat, voyaga yetish, beg‘ubor bolalikni sog‘inish va bugungi kun savollariga o‘tmishdagi xatti-harakatlardan javob izlash.
Film 1991-yilning eng katta daromad keltirgan milliy kinoasari bo‘lgan. Taeko ismli qizning ruhiy kechinmalari haqidagi bu hikoya hozirga qadar kundalik hayot to‘g‘risidagi realistik animelarning eng aniq va noyob namunalaridan biri sifatida e’tirof etilmoqda.
“Pompoko: Heysey davrida tanukilar urushi”
- Fantastika, drama, komediya.
- Yaponiya, 1994-yil
Isao Takaxataning yana bir asarida zamonaviy dolzarb masalalar qadimgi yapon afsonalari bilan uyg‘unlashib ketgan. Voqealar 90-yillarning o‘rtalarida Yaponiyada kechadi va tanuki (yenotsimon it) sehrli mavjudotlarining Tokio chekkasida ko‘p qavatli binolar qurilishiga qarshi kurashi haqida hikoya qiladi. Qaysar insonlarga qarshi turish uchun hayvonlar qadimgi shakl o‘zgartirish san’atini qayta tiklaydi va o‘z yashash muhitlarini saqlab qolish uchun jangovar harakatlarni boshlaydi.
“Qo‘shnilarimiz Yamadalar”
- Komediya, oilaviy.
- Yaponiya, 1999-yil.
- Davomiyligi: 1 soat 44 daqiqa.
- IMDb: 7,1.
Yamada oilasi haqidagi hazil-mutoyibali hikoyalar to‘plami zamonaviy yaponlarning kundalik turmush tarzi to‘g‘risidagi bitmas-tuganmas hazillar manbaidir. “Qo‘shnilarimiz Yamadalar” studiyaning kompyuterda yaratilgan ilk filmidir. Isao Takahata kompyuter animatsiyasiga nisbatan g‘arb yondashuviga mutlaqo teskari yo‘lni tanlaydi. “Yamada”ning ataylab qo‘lda chizilgandek ko‘rinadigan akvarel uslubi studiyaning odatiy animatsiyasidan keskin farq qiladi.
“Mushuk qaytishi”
- Fantastika, sarguzasht, oilaviy film.
- Yaponiya, 2002-yil.
- Davomiyligi: 1 soat 15 daqiqa.
- IMDb bahosi: 7,1.
Maktab o‘quvchisi Xaru mushukni yuk mashinasi ostidan qutqaradi. Ko‘p o‘tmay, u Mushuklar qirolligining shahzodasi ekanini bilib qoladi — bu xizmati uchun u shon-sharaf va ko‘plab sovg‘alarga sazovor bo‘ladi. Xaru bu kutilmagan “baxt”ni anglashga urinayotgan paytda, Qirol unga so‘nggi marhamatini ko‘rsatishga qaror qiladi: uni mushukka aylantirib, shahzodaga turmushga bermoqchi. Qiz esa buni xohlamaydi.
“Mushukning qaytishi” filmini debyutant rejissyor Xiroyuki Morita suratga olgan. Yosh ijodkor Miyazaki uslubining ta’siridan qochib qutula olmagan: ko‘plab elementlar uning dunyolaridan filmga ko‘chib o‘tgani yaqqol ko‘rinadi.
Izoh (0)