Sobiq Ittifoq davrida ulg‘ayganlar orasida Leopold ismli mushuk haqidagi multfilmni bilmaydigan kishi topilmasa kerak. Loyiha “Senimi, shoshmay tur!” yoki “Ayiqcha Vinni Puh” multfilmidek mashhur bo‘lmasa-da, har bir qism oxirida yangraydigan “Bolalar, kelinglar, do‘st-inoq bo‘liq yashaylik!”, so‘zlari bir nechta avlodning xotirasida muhrlanib qolgan. Ammo multfilmda muhim bir jihat ekran ortida qolib ketgan.
Mehribon va aqlli mushuk Leopold bosh qahramonlardan biri bo‘lib, u arzimas narsalar uchun atrofdagilar bilan janjallashmaslikni afzal ko‘radi, ikki sho‘x sichqoncha esa uni turli yo‘llar bilan bezovta qilishga harakat qiladi. Sichqonlarning biri oq va ozg‘in, ikkinchisi kulrang va do‘mboq ko‘rinishda. Ammo ularning ismlari multfilm davomida biror marta aytilmaydi.
Ko‘pchilik tomoshabinlar hatto sichqonlarning ismlari borligini ham bilmagan. Aslida esa oq sichqoncha — Mitya, kulrangi esa — Motya edi. To‘liq ismlari esa Dmitriy va Matvey bo‘lgan.
Unda nega biz ularning ismlarini hech qachon eshitmaganmiz? Sababi oddiy: multfilm mualliflari ataylab ularning ismlarini ovozli tarzda ishlatmaslikka qaror qilgan. Rejissyor Anatoloy Reznikov so‘zlariga ko‘ra, maktablarda Dmitriy yoki Matvey ismli bolalarni mazax qilinishidan xavotir olishgan, chunki sichqonchalar salbiy qahramonlar sifatida tasvirlangan edi. Har bir qism oxirida ularning tarbiyasi yaxshilanishiga qaramay, keyingi seriyalarda sichqonlar yana sho‘xliklariga qaytar edi.
Mitya va Motya qanchalik sho‘x bo‘lmasin, ular hech qachon tomoshabinda nafrat uyg‘otmagan. Sichqonlarning tentaklarcha jasorati va topqirligi ko‘pincha bolalarga yoqib tushgan, hatto ba’zida Leopoldning haddan ortiq yumshoq fe’l-atvoridan ham ko‘ra ko‘proq mehr uyg‘otgan.
Izoh (0)