Ghibli studiyasi Xayao Miyazakining yangi va so‘nggi “Qanday yashayapsiz?” animesidan ilk kadrlarni e’lon qildi.
Animedagi voqealar Ikkinchi jahon urushi paytida bo‘lib o‘tadi va unda onasining o‘limini yengishga urinayotgan 12 yoshli bolakayning hayoti hikoya qilinadi.
Miyazakining so‘nggi to‘liq metrajli ishi bo‘ladigan multfilm iyul oyi o‘rtalarida Yaponiyada namoyish etilgan va allaqachon 35 million dollardan ko‘proq mablag‘ to‘plashga muvaffaq bo‘lgan. Biroq, studiya an’anaviy reklama usullaridan voz kechishga qaror qilgan. Ghibli studiyasi bitta afishadan tashqari hech qanday reklama materialini chiqarmagan.
Animening yapon kataloglarida (broshyuralar) chop etilgan kadrlari avgust oyi boshida ijtimoiy tarmoqlarda paydo bo‘la boshladi. Ijtimoiy tarmoq foydalanuvchilari kadrlarni bir-biriga ulashgan.
Studiya multfilmdan olingan kadrlarni taqdim etdi. Ularda multfilmning bosh qahramoni, epizodik qahramonlar, shuningdek, xayoliy mavjudotlarni ko‘rishingiz mumkin.
.jpg)
Miyazakining avvalgi “Shamol kuchaymoqda” badiiy filmi chiqqaniga o‘n yil bo‘ldi. Rejissor yangi multfilm ustida 2016-yilda ish boshlagan edi. Ma’lumki, “Qanday yashayapsiz?” Yoshino Genzaburoning shu nomli romani asosida yaratildi, uning sujeti, mish-mishlarga ko‘ra, sezilarli darajada o‘zgargan. Loyiha hayotning ma’nosi va insonning dunyodagi o‘rni haqidagi falsafiy tezislar bilan to‘ldirilgan.
Miyazaki — Yaponiyada ham, dunyoda ham olamshumul mashhurlikka erishgan animator. Ehtimol, rejissorning ishi an’anaviy yapon motivlarini global mavzular bilan mohirona uyg‘unlashtira olgani uchun ham nafaqat yaponlarga, balki boshqa mamlakatlar tomoshabinlariga ham tushunarli va ko‘ngilga yaqin bo‘lgandir.
Miyazaki studiyasida ishlab chiqarilgan birinchi film — “Laputa – samoviy qal’a” (1986-yil) unga moliyaviy muvaffaqiyat va tomoshabinlar muhabbatini olib keldi.
“Ruhlar olami” (2001) animesi esa yapon kinosi tarixidagi eng yuqori daromad keltirgan film bo‘ldi – u deyarli 380 million dollar yig‘di. Bu film, shuningdek, BBC talqiniga ko‘ra, barcha davrlarning 100 ta eng yaxshi xorijiy filmlari ro‘yxatiga kirgan yagona anime film hisoblanadi.
Izoh (0)