Samarqand viloyati Toyloq tumanida 26-iyul kuni Zeboyi Jahon taxallusi bilan tanilgan xonanda Zebiniso Nosirova o‘ldirib ketildi. Bu haqda “Millar dasturi” xabar qildi.
Qotillikda uning turmush o‘rtog‘i gumon qilinmoqda. Xabarda aytilishicha, er bolalarini ko‘rish uchun xonandaning uyiga kelgan. Suhbat davomida er-xotin o‘rtasida janjal kelib chiqqan. Janjal paytida erkak uni qo‘llari bilan bo‘g‘gan, oqibatda ayol voqea joyida vafot etgan. Marhumaning akasi aybdor shaxsga imkon qadar qattiq jazo tayinlashni so‘radi.
Bosh prokuratura matbuot kotibi Hayot Shamsutdinovning ma’lum qilishicha, 1992-yilda tug‘ilgan erkakka nisbatan Jinoyat kodeksining 97-moddasi 1-qismi (qasddan odam o‘ldirish) bilan jinoyat ishi qo‘zg‘atilib, u qo‘lga olingan.
Xonanda 34 yoshda, uch farzandning onasi bo‘lgan.
Jinoyat kodeksiga ko‘ra, qasddan odam o‘ldirish 10 yildan 15 yilgacha ozodlikdan mahrum qilish bilan jazolanadi.
Izoh (0)