Rossiyada ishlab chiqarilgan mashhur animatsion multserial “Qizaloq va Maymoq” ko‘plab mamlakat bolalari orasida ommalashgan. Multfilm qiziquvchan, sho‘x va giperfaol qizaloq Masha hamda unga sabr bilan g‘amxo‘rlik qiluvchi Ayiq haqida hikoya qiladi. Loyiha haqiqiy fenomenga aylangan: uni Yevropadan tortib Osiyo, Lotin Amerikasi va Yaqin Sharqqacha bo‘lgan turli mamlakatlarda sevib tomosha qilishadi.
YouTube’da multfilmning har bir seriyasi yuz millionlab marta ko‘rilgan. Masha surati tushirilgan o‘yinchoqlar esa Disney qahramonlari bilan bir qatorda butun dunyo bo‘ylab bolalar do‘konlarida sotilmoqda. Xo‘sh, qanday qilib Disney, Pixar kabi xalqaro yirik studiyalarga aloqasi bo‘lmagan oddiy rus multfilmi global brendga aylandi?
Yuqori darajadagi sifat
Multfilmning asosiy yutug‘i — uning sifati. Kinotanqidchilar fikricha, xalqaro auditoriyani zabt etish uchun sifatli animatsiya katta ahamiyatga ega.
“Bu bolalarcha sho‘xlik haqidagi multfilm emas, balki texnik jihatdan juda puxta ishlangan animatsiya. Aynan shuning uchun Masha haqidagi hikoyalar tomoshabinlarga yoqdi. Unda faqat old fon harakatda bo‘lib, orqa fon qotib qolgan holatda turmaydi, multfilmda barcha narsalar jonli, harakatda bo‘ladi”, deydi ekspertlar.
Dastlabki epizodlardanoq vizual ko‘rinish va ssenariy ustida katta mehnat qilingani bilinadi. Shu sababli ham serial xalqaro animatsiya sanoatining e’tiborini tortdi.
Yirik studiyalar darajasidagi mustaqil loyiha
Ko‘p hollarda xorijiy mualliflar yirik studiyalar yordamisiz xalqaro bozorga chiqa olmaydi. Ammo “Qizaloq va maymoq” bu borada istisno bo‘ldi. Bu ijodkorlarning tajribasi, mahorati va ishlab chiqarish jarayoniga katta e’tibor berilgani natijasidir.
“Loyihaga juda katta mablag‘ tikilgani yaqqol seziladi. Natijada yuqori sifatli mahsulot yaratilgan”, deydi kinotanqidchi Aleksandr Golubchikov.
Chunki bu serial YouTube yoki televideniye uchun tayyorlangan arzon mahsulot emas. Loyiha mualliflari uchun sifat darajasi ustuvor vazifa sanalgan.
Puxta ishlab chiqilgan marketing strategiyasi
Har qanday multfilm qanchalik qiziqarli bo‘lmasin, agar uni hech kim ko‘rmasa, muvaffaqiyat ham qozonmaydi. Agar Animaccord kompaniyasi multfilmni xalqaro auditoriyaga targ‘ib qilmaganida, marketingga sarmoya kiritmaganida hamda kino yarmarkalarida ishtirok etmaganida edi, mitti qizaloq haqidagi multfilm xalqaro tomoshabinga yetib bormagan bo‘lardi.
Mazkur loyiha ijodiy g‘oya va to‘g‘ri rejalashtirilgan biznes strategiyasining uyg‘unligi qanday qilib global muvaffaqiyatga olib chiqishini isbotladi.
Barcha xalqlar uchun tushunarli hikoyalar
“Qizaloq va maymoq” ning yana bir yutug‘i uni tarjimasiz ham tushunish mumkinligidir. Har xil millat vakillari bu multfilmni osongina qabul qiladi.
Multfilm faqat bolalar uchun emas
Sovet animatsiyasi kabi “Qizaloq va maymoq” ham turli yoshdagi tomoshabinlarga mo‘ljallangan. Bu esa multfilmga yana bir karra ustunlik beradi. U bolalarga ham, kattalarga ham birdek qiziq bo‘la oladi.
Izoh (0)