Toshkent viloyatida Yaponiya texnologiyalari asosidagi gaz taʼminoti tizimi sinov tariqasida yo‘lga qo‘yildi, deb xabar bermoqda viloyat hokimligi matbuot xizmati.
Ma’lum qilinishicha, “Hududgaztaʼminot” AJ va Yaponiyaning ITO Corporation kompaniyasi o‘rtasidagi hamkorlik doirasida Angren shahrining “Yangiobod” mahallasida yangi loyiha sinov tariqasida ishga tushirildi.
Ushbu loyiha doirasida ITO Corporation tomonidan ishlab chiqilgan zamonaviy texnologiya — propan va havo aralashmasidan sintetik metan gazini oluvchi qurilmalar o‘rnatildi. Ushbu sintetik metan orqali pilot hududdagi bir nechta ko‘p qavatli uylarni gaz bilan taʼminlash tizimi yo‘lga qo‘yildi.
Qayd etilishicha, “Hududgaztaʼminot” AJ va Yaponiya kompaniyasi tomonidan loyihani yanada kengaytirish, zamonaviy uskunalarni respublika bo‘ylab joriy qilish yuzasidan amaliy ishlar olib borilmoqda.
-UtCb0e70.avif)
Mazkur tashabbus Yaponiya Iqtisodiyot, savdo va sanoat vazirligi ko‘magida amalga oshirilayotgan bo‘lib, O‘zbekistonda energiya samaradorligini oshirish, zamonaviy va ekologik toza texnologiyalarni joriy etishga qaratilgan strategik yo‘nalishlarning ajralmas qismi hisoblanadi.
Yaponiyaning ITO Corporation kompaniyasi — sanoat texnologiyalari sohasida faoliyat yurituvchi yirik savdo kompaniyasi. U asosan sanoat uskunalari, harakatlanuvchi qismlar (motorlar, tormozlar, reduktorlar) va avtomatlashtirish tizimlariga ixtisoslashgan.
Milliy statistika qo‘mitasi ma’lumotlariga ko‘ra, 2025-yil yanvar—aprel oylarida O‘zbekiston 150,5 million dollarlik tabiiy gaz import qilgan. Bu o‘tgan yil mos davridagidan 64,2 foizga kam.
Izoh (0)