Xitoyda sud poraxo‘rlikda ayblanayotgan amaldorni o‘lim jazosiga hukm qildi, biroq hukm ijrosi ikki yilga kechiktirildi. Bu haqda China Daily xabar berdi.
Ma’lum qilinishicha, ayblanuvchi noqonuniy ravishda 15 million dollardan ortiq mablag‘ olgan. Gap Xunan provinsiyasi Xalq siyosiy maslahat kengashi qo‘mitasi raisi sobiq o‘rinbosari Day Daojin haqida ketmoqda. Hukm 24-iyun kuni Guandun provinsiyasi Chjuxay shahri sudida e’lon qilingan.
Ayblanuvchi Day Daojin poraxo‘rlik uchun o‘lim jazosiga hukm qilindi, hukm ijrosi ikki yilga kechiktirildi, u umrbod siyosiy huquqlardan mahrum etildi va barcha shaxsiy mol-mulki musodara qilindi, deyiladi sud hukmida.
Bundan tashqari, mansabdor shaxsning noqonuniy yo‘l bilan qo‘lga kiritgan mol-mulki va undan keladigan daromadlar davlat xazinasiga topshirilishi, kamomad bo‘lgan taqdirda esa yana undirilishi lozim.
Ta’kidlanishicha, Day Daojin turli lavozimlardagi xizmat mavqeyidan g‘arazli maqsadlarda foydalangan. U to‘g‘ridan to‘g‘ri yoki qarindoshlari orqali “jami 107 million yuandan ortiq (taxminan 14,9 million dollar) moliyaviy va moddiy boyliklarni noqonuniy ravishda” qabul qilgan.
Xitoy raisi Si Szinpin avvalroq korrupsiyaga qarshi kurash bir daqiqa ham to‘xtashi mumkin emasligini aytgan edi. U partiya korrupsiyaga hech qachon toqat qilmasligini ta’kidlagan. Xitoyda korrupsiyaga oid jinoyatlar bo‘yicha sud tomonidan o‘lim jazosi tayinlanib, uning ijrosi ikki yilga kechiktirilishi kamdan kam uchraydigan holat emas. Ikki yil o‘tgach, o‘lim jazosi umrbod qamoq jazosiga almashtirilishi mumkin.
Izoh (0)