Janubiy Koreya prezidenti Li Je Myong 15-avgust – mamlakatning Ozodlik kuni munosabati bilan so‘zlagan nutqida Yaponiyani mustamlakachilik davridagi tarixiy adolatsizliklar bilan yuzma-yuz kelishga chaqirdi. Bu haqda The Independent xabar berdi.
Janubiy Koreya prezidenti mamlkat hali ham o‘tmishdagi adolatsizliklarni his qilib yashayotganini ta’kidlab, shunday degan:
“Ko‘plab koreyslar hali ham o‘tmishda ko‘rilgan adolatsizliklarning og‘irini his qilib yashamoqda. Bu hal etilmagan muammolar Seul va Tokio munosabatlarini to‘liq tiklashga to‘sqinlik qiladi”.
Li Je Myongning aytishicha, Yaponiya muhim hamkor, ammo kelajak sari yurish uchun o‘tmishni unutmaslik kerak. Prezidentning ushbu bayonoti Seul va Tokio o‘rtasidagi “nozik” pallaga to‘g‘ri kelmoqda. Ikki davlat o‘rtasida iqtisod va xavfsizlikda hamkorlik muhim bo‘lsa-da, Ikkinchi jahon urushi davridagi majburiy mehnat va “tinchlik ayollari” (jinsiy qullikka majburlangan koreys ayollar) masalalari munosabatlarni yillar davomida keskinlashtirib kelmoqda.
Tokio barcha kompensatsiyalar 1965-yildagi diplomatik bitim bilan yopilganini ta’kidlab keladi. Ammo Seul sudlari jabrlanganlar foydasiga qaror chiqargan. Prezident Li esa avvalgi hukumat ishlab chiqqan — tovon pullarini yapon kompaniyalaridan emas, Janubiy Koreya hukumati qo‘llab-quvvatlagan fond orqali to‘lash rejasini davom ettirishga tayyorligini bildirmoqda.
Li Je Myong, shuningdek, Yaponiyaning yangi bosh vaziri Shigeryu Ishiba bilan muntazam o‘zaro tashriflar va uchrashuvlarni yo‘lga qo‘yishni rejalashtirib, 23-avgust kuni Tokioda uchrashuv bo‘lib o‘tishi haqida ma’lum qilgan. Shu haftada bo‘lib o‘tgan yapon vazirlarining Tokiodagi Yasukuni ibodatxonasiga tashrifi esa Seulning keskin noroziligiga sabab bo‘lmoqda — Janubiy Koreya TIV bu joyni “yapon agressiyasi va urush jinoyatchilarini ulug‘lovchi ramz” deb atadi.
Janubiy Koreya prezidenti o‘z nutqida “tinchlik ayollari” dardini ham yodga olib, ularning sha’ni va qadr-qimmatini tiklashni va’da qilgan. U, shuningdek, Shimoliy Koreya bilan munosabatlarda ham murosaga asoslangan yondashuvni taklif qilgan. Li avvalgi rahbar Yun Sok Yol singari “shimolni qo‘shib olish” orqali emas, balki bosqichma-bosqich ishonch va muloqot yo‘li bilan yaqinlashishga intilishini ta’kidlagan.
“Biz Shimoliy Koreya tizimini hurmat qilamiz va hech qanday shaklda dushmanlik harakatlariga intilmaymiz”, dedi Li.
Li o‘z nutqining yakunida Koreya mustaqillik kurashchilari xotirasiga hurmat bajo keltirib, ularning oilalariga qo‘llab-quvvatlashni kengaytirishga va tarixiy xotirani asrashga so‘z bergan. Bundan tashqari, u mamlakat ichida “eskirgan mafkuralarga asoslangan bo‘linish”larni yengib, siyosatda muloqot va murosaga intilishga chaqirgan.
Izoh (0)