Жанубий Корея президенти Ли Же Мёнг 15 август – мамлакатнинг Озодлик куни муносабати билан сўзлаган нутқида Японияни мустамлакачилик давридаги тарихий адолатсизликлар билан юзма-юз келишга чақирди. Бу ҳақда The Independent хабар берди.
Жанубий Корея президенти мамлкат ҳали ҳам ўтмишдаги адолатсизликларни ҳис қилиб яшаётганини таъкидлаб, шундай деган:
“Кўплаб корейслар ҳали ҳам ўтмишда кўрилган адолатсизликларнинг оғирини ҳис қилиб яшамоқда. Бу ҳал этилмаган муаммолар Сеул ва Токио муносабатларини тўлиқ тиклашга тўсқинлик қилади”.
Ли Же Мёнгнинг айтишича, Япония муҳим ҳамкор, аммо келажак сари юриш учун ўтмишни унутмаслик керак. Президентнинг ушбу баёноти Сеул ва Токио ўртасидаги “нозик” паллага тўғри келмоқда. Икки давлат ўртасида иқтисод ва хавфсизликда ҳамкорлик муҳим бўлса-да, Иккинчи жаҳон уруши давридаги мажбурий меҳнат ва “тинчлик аёллари” (жинсий қулликка мажбурланган корейс аёллар) масалалари муносабатларни йиллар давомида кескинлаштириб келмоқда.
Токио барча компенсациялар 1965 йилдаги дипломатик битим билан ёпилганини таъкидлаб келади. Аммо Сеул судлари жабрланганлар фойдасига қарор чиқарган. Президент Ли эса аввалги ҳукумат ишлаб чиққан — товон пулларини япон компанияларидан эмас, Жанубий Корея ҳукумати қўллаб-қувватлаган фонд орқали тўлаш режасини давом эттиришга тайёрлигини билдирмоқда.
Ли Же Мёнг, шунингдек, Япониянинг янги бош вазири Шигерю Ишиба билан мунтазам ўзаро ташрифлар ва учрашувларни йўлга қўйишни режалаштириб, 23 август куни Токиода учрашув бўлиб ўтиши ҳақида маълум қилган. Шу ҳафтада бўлиб ўтган япон вазирларининг Токиодаги Ясукуни ибодатхонасига ташрифи эса Сеулнинг кескин норозилигига сабаб бўлмоқда — Жанубий Корея ТИВ бу жойни “япон агрессияси ва уруш жиноятчиларини улуғловчи рамз” деб атади.
Жанубий Корея президенти ўз нутқида “тинчлик аёллари” дардини ҳам ёдга олиб, уларнинг шаъни ва қадр-қимматини тиклашни ваъда қилган. У, шунингдек, Шимолий Корея билан муносабатларда ҳам муросага асосланган ёндашувни таклиф қилган. Ли аввалги раҳбар Юн Сок Ёл сингари “шимолни қўшиб олиш” орқали эмас, балки босқичма-босқич ишонч ва мулоқот йўли билан яқинлашишга интилишини таъкидлаган.
“Биз Шимолий Корея тизимини ҳурмат қиламиз ва ҳеч қандай шаклда душманлик ҳаракатларига интилмаймиз”, деди Ли.
Ли ўз нутқининг якунида Корея мустақиллик курашчилари хотирасига ҳурмат бажо келтириб, уларнинг оилаларига қўллаб-қувватлашни кенгайтиришга ва тарихий хотирани асрашга сўз берган. Бундан ташқари, у мамлакат ичида “эскирган мафкураларга асосланган бўлиниш”ларни енгиб, сиёсатда мулоқот ва муросага интилишга чақирган.
Изоҳ (0)