Ozarbayjon vakili 12-avgust kuni Sankt-Peterburgda bo‘lib o‘tgan MDH ichki ishlar vazirlari kengashi yig‘ilishiga bormadi. Bu haqda APA agentligi xabar berdi.
Ma’lum qilinishicha, ichki ishlar vaziri Viloyat Eyvazov tadbirda ishtirok etishdan bosh tortgan. Buning sababiga aniqlik kiritilmagan. Yig‘ilish Rossiya ichki ishlar vaziri Vladimir Kolokolsev raisligida bo‘lib o‘tgan.
Unda o‘zaro hamkorlik va jinoyatchilikka qarshi birgalikda kurashish, noqonuniy migratsiya muammolari va axborot-kommunikatsiya texnologiyalaridan foydalanish muhokama qilingan. Kolokolsev tabrik so‘zida ilgari SSSR tarkibiga kirgan MDH davlatlarining “umumiy tarixini qayta yozishga urinishlari” mavzusiga to‘xtalgan.
Ozarbayjon 11-avgust kuni Ukrainaga 2 million dollarlik elektr uskunalari ko‘rinishida gumanitar yordam yuborishini e’lon qildi. Rossiya deputati Andrey Gurulyov javob choralari sifatida Ozarbayjon tovarlarini import qilishni taqiqlashga, ozarbayjonlik tadbirkorlarni “siquvga olish”ga chaqirdi.
Bokuning ochiqchasiga Kiyevni qo‘llab-quvvatlashiga Rossiyaning hujumi turtki bo‘ldi. Prezident Ilhom Aliyev Rossiyani Ozarbayjon obyektlariga “maqsadli zarba berish”da aybladi. Ozarbayjonning Ukrainadagi obyektlari bir necha bor hujumga uchradi. Boku, agar Rossiyaning agressiv siyosati davom etsa, Ukrainaga qurol eksportini qayta tiklash bilan tahdid qildi.
Rossiya va Ozarbayjon o‘rtasidagi keskinlik
Bungacha Rossiya va Ozarbayjon o‘rtasidagi munosabatlarning keskinlashiga aviahalokat va Ozarbayjon fuqarolariga nisbatan zo‘ravonlik sabab bo‘lgandi. Jumladan, 2024-yil 25-dekabr kuni Qozog‘istonda Ozarbayjonning Azerbaijan Airlines (AZAL) aviakompaniyasining Embraer samolyoti fojiali aviahalokatga uchradi. Uchoq Boku—Grozniy reysini amalga oshirgandi.
Biroq samolyot favqulodda Oqtov viloyatiga qo‘nish chog‘i halokatga uchragan. Bortda 62 nafar yo‘lovchi va 5 nafar ekipaj a’zosi bo‘lgan. Hodisa oqibarida 38 kishi halok bo‘lgan, yana 29 kishi jarohatlangan. Prezident Ilhom Aliyevning ta’kidlashicha, samolyot radioelektron kurash vositalari yordamida boshqarilmaydigan holatga keltirilgan, Rossiya hududidan hujumga uchragan. Hozirda Qozog‘istonda holat yuzasidan tergov ishlari olib borilmoqda.
Ozarbayjon fuqarolarining qiynoqqa solinishi va o‘limi
27-iyun kuni Rossiyaning Yekaterinburg shahrida huquq-tartibot xodimlari reyd o‘tkazib, Ozarbayjon fuqarolarini jinoyatga aloqadorlikda gumonlab, hibsga olgan. Hibsga olinganlar — deyarli himoyasiz bo‘lgan holatda — qo‘lga olish jarayonida, yo‘lda va ma’muriy binolarda qattiq qiynoqlarga, ko‘p marotaba og‘ir jarohatlarga duchor bo‘lgan. Ularning turli tana qismlariga qattiq va o‘tkir buyumlar bilan urilgan.
Oqibatda o‘sha kuni Yekaterinburg shahar ichki ishlar bo‘limi binosida 1966-yilda tug‘ilgan ozarbayjonlik Guseyn Safarov, kichik biznes egasi, vafot etgan. Uning ukasi, 1970-yilda tug‘ilgan Ziyaddin Safarov esa ertalab maxsus bo‘linmaning xizmat mashinasida kaltaklanishdan vafot etgan. U ikki farzandning otasi bo‘lib, taksichilik qilgan.
Ozarbayjon Rossiya huquqni muhofaza qilish organlari xodimlari tomonidan uning fuqarolarini qiynoqqa solinib, o‘ta shafqatsizlik bilan o‘ldirilishi yuzasidan jinoyat ishi qo‘zg‘atgan.
Izoh (0)