Bugun, 4-avgust kuni prezident Shavkat Mirziyoyev amaliy tashrif bilan Turkmanistonga yetib bordi. Davlat rahbari Turkmanboshi shahriga kelgach, Turkmaniston xalq maslahati raisi Gurbanguli Berdimuhamedov bilan uchrashuv o‘tkazdi. Bu haqda Prezident matbuot xizmati xabar berdi.
O‘zbekiston prezidenti Turkmanistonga tashrifini Gurbanguli Berdimuhamedov bilan uchrashuv o‘tkazishdan boshladi.
Suhbat avvalida Shavkat Mirziyoyev Gurbanguli Berdimuhamedovni BMTning Dengizga chiqish imkoni bo‘lmagan rivojlanayotgan mamlakatlar bo‘yicha uchinchi konferensiyasi yuksak saviyada o‘tkazilayotgani bilan samimiy qutlagan. Kun tartibiga kiritilgan masalalar mintaqa barqaror taraqqiyoti uchun g‘oyat muhim ahamiyatga ega ekanini alohida taʼkidlagan.
“Joriy yil aprel oyida Samarqand shahrida o‘tgan uchrashuvda erishilgan kelishuvlarni amalga oshirish doirasida O‘zbekiston-Turkmaniston yaxshi qo‘shnichilik va strategik sheriklik munosabatlarini yanada mustahkamlashning dolzarb masalalari ko‘rib chiqildi. Do‘stlik, o‘zaro ishonch va umumiy manfaatlarni hisobga olish tamoyillariga asoslangan ko‘p qirrali hamkorlik surʼati ortib borayotgani katta mamnuniyat bilan qayd etildi. Barcha darajalarda samarali va faol muloqotlar davom etmoqda.
Yil boshidan buyon tovar ayirboshlash 600 million dollarni tashkil etdi. Sanoat, energetika, transport, qishloq va suv xo‘jaligi, iqtisodiyotning boshqa tarmoqlarida kooperatsiya chuqurlashib bormoqda. Birgalikda “Shovot-Toshovuz” chegaraoldi savdo zonasi tashkil etilmoqda, faol hududlararo aloqalar va gumanitar almashinuvlar davom ettirilmoqda”, deyiladi manbada.
Maʼlum qilinishicha, bo‘lajak oliy darajadagi uchrashuvlarga tayyorgarlik doirasida hukumatlararo komissiyalar yig‘ilishlari, Ishbilarmonlar kengashi, Hududlar forumi, qator madaniy tadbirlar o‘tkazilishi ko‘zda tutilgan. Shuningdek, BMT konferensiyasi kun tartibi hamda joriy yil kuzda Toshkent shahrida o‘tkazilishi rejalashtirilgan Markaziy Osiyo davlatlari rahbarlarining 7-maslahat uchrashuvi yuzasidan atroflicha fikr almashilgan.
Maʼlumot uchun, “Avaza” milliy sayyohlik zonasida bo‘lib o‘tadigan tadbirda BMT bosh kotibi Antoniu Guterrish, xorijiy davlatlar va hukumatlar, xalqaro va mintaqaviy tashkilotlar rahbarlari qatnashadi.
Konferensiya kun tartibidan transport jihatidan o‘zaro bog‘liqlikni mustahkamlash va savdo tartib-taomillarini soddalashtirish, iqtisodiy transformatsiya, iqlim o‘zgarishi va atrof-muhit uchun xatarlarga bardoshlikni oshirish, Barqaror rivojlanish maqsadlarini ro‘yobga chiqarishda xalqaro hamkorlikni rivojlantirishning dolzarb masalalari o‘rin olgan. “Avaza” siyosiy deklaratsiyasi va harakatlar dasturining qabul qilinishi ko‘zda tutilgan.
Eslatib o‘tamiz, Shavkat Mirziyoyev 2024-yil oktyabr oyida amaliy tashrif bilan Turkmanistonga tashrif buyurgan edi. Safar davomida prezident turkman shoiri va mutafakkiri Maxtumquli Firog‘iy tavalludining 300-yilligiga bag‘ishlangan “Zamon va sivilizatsiyalarning o‘zaro bog‘liqligi – tinchlik va taraqqiyot asosi” xalqaro forumining yalpi majlisida nutq so‘zlagandi.
Izoh (0)