Jizzax viloyatining Baxmal tumanida hokimlik zaxirasidagi yerni internetdagi platforma orqali yarim milliard so‘mga sotishga uringan fuqaro sud qilindi. U bu qilmishi uchun 70 million so‘m jarimaga tortildi. “Daryo” bu haqdagi sud hujjati bilan tanishdi.
Maʼlum bo‘lishicha, viloyatning Baxmal tumanida yashovchi fuqaro otasidan qolgan, tuman hokimligi zaxirasidagi tomorqasini sotishga uringan. U moddiy manfaatdor bo‘lish maqsadida Baxmal tumanining “Nushkent” mahallasi Jo‘m-jo‘m qishlog‘idagi 0,48 gektar tomorqani kelgusida o‘zboshimchalik bilan egallab olib, internetdagi “Olx” savdo platformasida 500 million so‘mga sotishga urindi.
U yerga xaridor qidirar ekan “Baxmalda 100 sotix bog‘ dacha bor, shuni 500 mln so‘mga sotaman”, deb eʼlon qoldirgan. Unga aloqaga chiqqan fuqaroga esa yerning kadastr hujjatlarida hech qanday muammo yo‘qligini aytib, xaridorning ishonchiga kirgan.
Shundan so‘ng fuqaro tomorqa yerni xaridor bilan 485 million so‘mga kelishib, Jizzax shahri hududidagi “Davlat xizmatlari markazi”ga qarashli avtoturargohda pulni sanab olgan. Shu paytda Bosh prokuratura huzuridagi Departamentning Jizzax viloyat boshqarmasi va viloyat IIB xodimlari tomonidan ashyoviy dalillar bilan ushlangan.
Fuqaroning ushbu qilmishi 2025-yilning 31-iyul kuni Jinoyat ishlari bo‘yicha Do‘stlik tuman sudida ko‘rib chiqildi. Sudya Umurzoqov davlat yerini noqonuniy sotishga uringan uddaburon qilmishini ko‘rib chiqib, uni Jinoyat kodeksining 168-moddasi (firibgarlik) bilan aybdor deb topdi va fuqaroni 70 million so‘m jarimaga tortdi.
Izoh (0)