Ukraina Turkiya prezidenti Rajab Toyyib Erdo‘g‘onning tashrifiga tayyorgarlik ko‘rmoqda. Bu haqda Ukrainaning Turkiyadagi elchisi Nariman Jelal ma’lum qildi.
Ma’lum qilinishicha, bu Erdo‘g‘onning 2022-yilda urush boshlanganidan beri Kiyevga ilk tashrifiga aylanadi. Prezident Vladimir Zelenskiyning shaxsan o‘zi turkiyalik hamkasbini taklif qilgan.
Men bu taklifni Turkiya prezidenti bilan uchrashuvda yetkazdim. Tashrif katta sa’y-harakatlarni talab qiladi, chunki uni amalga oshirishga to‘sqinlik qilayotgan ko‘plab masalalar mavjud, dedi Nariman Jelal.
Diplomat tashrifning asosiy mavzusi Ukraina va Turkiya o‘rtasidagi erkin savdo to‘g‘risidagi bitimni ratifikatsiya qilish bo‘lishi mumkinligini aytdi. Ushbu hujjat ham strategik hamkorlik, ham Ukraina biznesining katta qismi uchun muhim ahamiyatga ega.
Prezident Zelenskiyning taklifi juda oddiy: Turkiya erkin savdo shartnomasini imzolashdan manfaatdor. Bu kelishuv biznesimizning katta qismi uchun ham muhim, biroq ayrimlar uchun raqobatning kuchayishi tufayli muammolar keltirib chiqarishi mumkin. Ammo bu siyosiy qarordir. Prezident Zelenskiy Erdo‘g‘onning tashrifi paytida ushbu kelishuvni ratifikatsiya qilishni taklif etdi. Bu yaxshi va ramziy qadam bo‘lardi, deya izoh berdi Jelal.
Ma’lumot o‘rnida Erdo‘g‘on oxirgi marta 2022-yil 3-fevral kuni Kiyevga tashrif buyurgan edi. Rossiyaning Ukrainaga keng ko‘lamli hujumi esa 24-fevral kuni boshlangan. Tashirifi davomida Turkiya prezidenti Ukraina-Rossiya sammitini o‘tkazishni taklif qilgan edi. Chunki Yevropa ittifoqi yetakchilari Moskva hujum qilishi mumkinligidan xavotirda bo‘lgan. O‘sha paytda Rossiya Ukraina chegaralariga to‘plagan 100 mingdan ortiq qo‘shinini olib chiqib ketishdan bosh tortgan.
Erdo‘g‘on ikki qo‘shni o‘rtasidagi mojaroni ko‘rishni yoqtirmasligini, ammo NATO a’zosi sifatida, agar Rossiya Ukrainaga bostirib kirsa, Turkiya transatlantik harbiy ittifoqning sharqiy qanotini himoya qilish uchun zarur choralarni ko‘rishini ta’kidladi, degan edi Al Jazeera muxbiri Sinem Koseo‘g‘li.
Izoh (0)