Украина Туркия президенти Ражаб Тоййиб Эрдўғоннинг ташрифига тайёргарлик кўрмоқда. Бу ҳақда Украинанинг Туркиядаги элчиси Нариман Желал маълум қилди.
Маълум қилинишича, бу Эрдўғоннинг 2022 йилда уруш бошланганидан бери Киевга илк ташрифига айланади. Президент Владимир Зеленскийнинг шахсан ўзи туркиялик ҳамкасбини таклиф қилган.
Мен бу таклифни Туркия президенти билан учрашувда етказдим. Ташриф катта саъй-ҳаракатларни талаб қилади, чунки уни амалга оширишга тўсқинлик қилаётган кўплаб масалалар мавжуд, деди Нариман Желал.
Дипломат ташрифнинг асосий мавзуси Украина ва Туркия ўртасидаги эркин савдо тўғрисидаги битимни ратификация қилиш бўлиши мумкинлигини айтди. Ушбу ҳужжат ҳам стратегик ҳамкорлик, ҳам Украина бизнесининг катта қисми учун муҳим аҳамиятга эга.
Президент Зеленскийнинг таклифи жуда оддий: Туркия эркин савдо шартномасини имзолашдан манфаатдор. Бу келишув бизнесимизнинг катта қисми учун ҳам муҳим, бироқ айримлар учун рақобатнинг кучайиши туфайли муаммолар келтириб чиқариши мумкин. Аммо бу сиёсий қарордир. Президент Зеленский Эрдўғоннинг ташрифи пайтида ушбу келишувни ратификация қилишни таклиф этди. Бу яхши ва рамзий қадам бўларди, дея изоҳ берди Желал.
Маълумот ўрнида Эрдўғон охирги марта 2022 йил 3 февраль куни Киевга ташриф буюрган эди. Россиянинг Украинага кенг кўламли ҳужуми эса 24 февраль куни бошланган. Таширифи давомида Туркия президенти Украина-Россия саммитини ўтказишни таклиф қилган эди. Чунки Европа иттифоқи етакчилари Москва ҳужум қилиши мумкинлигидан хавотирда бўлган. Ўша пайтда Россия Украина чегараларига тўплаган 100 мингдан ортиқ қўшинини олиб чиқиб кетишдан бош тортган.
Эрдўғон икки қўшни ўртасидаги можарони кўришни ёқтирмаслигини, аммо НАТО аъзоси сифатида, агар Россия Украинага бостириб кирса, Туркия трансатлантик ҳарбий иттифоқнинг шарқий қанотини ҳимоя қилиш учун зарур чораларни кўришини таъкидлади, деган эди Al Jazeera мухбири Синем Косеўғли.
Изоҳ (0)